Acts 19:1-25

¹Maranai Apollos Corinth yai i mamana wai, Paul kamonai wata ketai i yewo i nae ku Ephesus ba namai bigeruwana biyisi mutusi i pananisi, wai i toirubaisi,

²“Maranai koi geruwana wai Kanuma Kaobaisiyena ko yauni kona?” Si kaobeyei, “Kega! Kega ka kuiri kata Kanuma Kaobaisiyena e mamana.”

³Paul i toiruba, “Kata abi babataito ko yauni?” Si kaobeyei, “John ana babataito.”

⁴Ba Paul i wona, “John ana babataito wai kona tombaubauna babataitona. Pipiya i wonisi kata kesana murikuai e botubotu wai siti geruwei, kona wai Iesu.”

⁵Nikona si nonori wai Bada Iesu kana wabai si babataito.

⁶Ba Paul nimana ku tepasi i terei wai, Kanuma Kaobaisiyena i bonuvisi ba gamo bubausi yai si sisiya, si peroveta wona ba yebo God warana si yoneyonei.

⁷Sebasebare ereonowasi asi 12.

⁸Nawaravi tonu kamonai, Paul Jew biyisi asi dugu yovenai ere tepatorana, i biogatara ba i binuwatainisi God ana basileiya kairaviana.

⁹Saba mutusi nuwanuwasi padapadasi kega si geruwana ba debai Keresiyana asi bitumagana si gigimi. Damanina Paul i sumarisi ba bigeruwana biyisi yabata si nae Tyrannus ana ku bibeyebeyena yovena. Ba namai kao patepatena Wara Gairena si bisisiyei.

¹⁰Nikona bodu ruwamo kamonai si wosei, wai Jew ba Greek biyisi ereonowasi Asia kupurina kamonai, Wara gairena si nonori.

¹¹God maragata Paul i berei wai kiyakiyaya kega si kinakinana wai i wose.

¹²Memena bage kareko kabana si botuwei Paul sinina si kasi rubai ba si yauni si nae gubagubagisi kurisi wai si yawasisi ba kanuma goyogoyosi si kasibau taveyisi.

¹³Jew biyisi mutusi kupura nunusi yai si yewoyewo neubuwa, ba asi waina Bada Iesu kana wabai kanuma goyogoyosi siti kasibaunisi, wai si wonawona, “Iesu, Paul i raumamarei wai, kona kana wabai ka kaotunetuneyim, ke kasibau!”

¹⁴Jew biyisi asi priest kaikapona kana waba Sceva natunatuna sebasebare asi 7 niko wose si wosewose.

¹⁵Saba kao kesana, kanuma goyona i kaobeyisi, “Iesu wai a kuiri, ba Paul yebo a kuiri, saba komi iyabomi?”

¹⁶Damanina ba sebare kanuma goyona kamonai i mamana wai, i sou ku tepasi ba i gebowabowasi i gudaisi, wai ere taratarasi ba ere nimanimasi yovenai si vera si kasibau.

¹⁷Jew ba Greek biyisi Ephesus kamonai si mamana wai warana si nonori wai si nagara saki, Bada Iesu kana waba si bokuwayei ba si wareyei.

¹⁸Pesarisi iyabosi si geruwana wai si botu ba asi piragagoyosi si tombubaunisi.

¹⁹Kaikairapu mutusi, asi kairapu bukasi si yauna si botu ba debai si kapuna, kairavina ereonowana si Keresiyana. Bukasi maisasi wai 50,000 silver coins.

²⁰Niko wose yai ba Wara Gairena i maragata ba dobu ereonowanai i kampesipesi.

²¹Nikosi wose tupasi si tupuwa murinai, Paul i nuwanotanota kata Macedonia ba Achaia kamosi yai wata ita nae ku Jerusalem. Kona murinai wai i wona, “Ana nae ku Rome.”

²²Ba kana bibaita asi ruwao, Timothy ba Erastus i poraisi ku Macedonia kupurina, ba kona Asia kupurinai i mana mara yogina.

²³Kona maranai Iesu bitumaganina Keresiyana ketana kairavina wai, bai yowa kaikaponai tupuwa.

²⁴Sebare kana waba Demetrius sawara silver ai e wosewose wai kona, silver ai Greek asi god wasike kana waba Artemis tara bibisakina i wosewose, wai mane kaikapona kona ba ana saibisaibirisi si yuyauni.

²⁵Ana sabisabirisi ba pipiya mutusi asi bagibagi kesanina yabata i yorisi ba i wonisi, “Au dam, ko kuiri kata ata mariya niko sabirai e botubotu.