Acts 18:6-25

⁶Wate mai Jew Paul i viḡaviei ma riwa apoapoenei i ririwei. Ma tauna ana gara i rauabuabui ma awari i riwa, “Mepa da o kwako, lamna ona viwavu-melemi, eḡa tau ona viwavuiu! Marina da e nenae, ana nae Jentail awari.”

⁷Ma taui i voterei ma i nae Jentail wavana Titus Justus ana au numa i mae, tauna God tauviborumeina ma ana numa pari numana au ḡereḡerena.

⁸Crispus, pari numana ai bada, Bada i vitumaḡanei ana numa ravai maiteni, ma mai Corinth maḡamaḡaui Paul i rautaniḡanei, i vitumaḡana ma i babataito.

⁹Waguvara tagogi Bada Paul ana au inana i babani i pa, “Eḡa ma rovo, ma babani ma eḡa ma genuana.”

¹⁰Aubaina Tau tam maiteni. Ma rava eḡa ina rau-iviapoapoelem aubaina au tauvotaḡotaḡo i maḡa wei au dobuna.

¹¹Ma Paul kampa i mae madeḡa tagogi ma nawaravi six, ma God riwana i jimei.

¹²Wate maranai Galio i vi-Gavena au Akaia provins, mai Jew kampa i vitagogiei ma Paul i vojijini ma i naei Gavena awarina da ita rauetarei.

¹³Ma taui i viwavui ʼpa, “Wei orotona ana moruei rava orai e taitaini da God e viviborumei ma ata tarawatu e viviaigai.”

¹⁴Ma Paul gamona i laḡi da ita babani ma Galio i babani mai Jew awari i pa, “Mepa da taumi wei ravana o viviwavui da kaua ḡaeḡaei bo kaua apoapoe aubaina, lamna tau au nola da ata rau-taniḡanemi.

¹⁵Wate wei taumi ami babani ami wava ma ami tarawatu, ana voterei au urami. Tau eḡa wei kauai ana rauetarei.”

¹⁶Ma etara numanei i viaḡaḡana-opunei.

¹⁷Taui anatapui pari numana ai bada Sothenis i vojijini ma i vunui etara numana au naona wate Galio taui i ʼnana-tawanei.

¹⁸Paul i mae mara aburuna tauvitumaḡana maiteni au Corinth ma wagei i nae au ḡereḡere au Cenkirei waga ai au animae. Prisila ma Akwila maiteni. Ma kampa Paul ana parivainuaḡana aubaina aparana i ḡari, ma anatapui i nae au Syria

¹⁹Taui au Ephesus i ḡeta ma Paul, Prisila ma Akwila i voterei. Ma i nae au boru numana Mai Jew awari i jima.

²⁰Rava i vibaḡai da ita mae mara aburuna wate tauna eḡa ita vianina.

²¹Wate maranai i opu da ita nae ma taui i riwei, “Ana nememei mepa da God ana ḡoana, ma Ephesus i netawanei ma wagei i damana.”

²²Maranai i ḡeta au Caesarea ma i nae au Jerusalem da kerisiana i raugenari ma i nae au Antiok.

²³Au Antiok i mae mara aburuna ma Galatia provins ma Pirijia provins i naeni ma kerisiana i vovai-virewapani.

²⁴Wei marana Apolos tauna Jew, au Alexandria da Egypt da i nei au Ephesus. Tauna Bada riwana ma ana giruma i aramana-kauei ma rava bababanina.

²⁵Rava ḡelaui, Apolos Bada ana etanai babanina, i viararamani, ma ana tepatorana i jima ma Iesu ana kaua ma ana lawana i viararamana-kauei. Wate tauna John Taubabataito ana babataito babani ava i aramanei.