Acts 18:14-26

¹⁴Paul i dagui iti sisiya saba Gallio, Jew biyisi kurisi i wona, “Abisiri yai Rome kairuwana ini kasikotobi wai ana nonorimi ba ami kairuwana ini kasikotobi wai ikesimi ko tere bitotori.

¹⁵Saba komi kona, wona ba waba ba ami kairuwana kairavina ko bikawapata, wai komi wata ko bobitotori. Yauku kega nikosi ani buibuiyana.”

¹⁶Ba bibuibuiya yovena kamonai i kwabinisi.

¹⁷Damanina ba ereonowasi si taibira ba Jew biyisi asi dugu yove badana wauna Sosthenes, bibuibuiya yovena kamonai si botawani ba si gudai. Saba awaika si wosewosei wai Gallio i ma paraparaga.

¹⁸Paul Corinth yai bigeruwana biyisi yabata kao pesarisi si mana, ba i sumarisi Priscilla ba Aquila yabata ku waka si geru ba si nae ku Syria. Muri yai sita geru wai Cenchreai, ana kaobiyoyobana nununai wai uyavina si garibi.

¹⁹Si verakasibau ku Ephesus wai, Paul namai, Priscilla ba Aquila i sumarisi. Ba ikesina, i nae Jew biyisi asi ku dugu yovena ba Jew biyisi yabata si ogatara.

²⁰Kona maranai si babai yabata mara yogina sita mana wai, i totoyana.

²¹Saba i bisumarisi wai i kaobiyoyobanisi, “God ana wainai wai ana veramaga, ba Ephesus yai wakai i geru.”

²²Maranai i verakasibau ku Caesarea wai i gae bigeruwana biyisi Jerusalem yai i kakaivisi ba i nae ku Antioch.

²³Paul Antioch yai i mana i kakaba wai Galatia kupurina, ba Phrygia kupurina kamosi yai wata i veramaga ba bigeruwana biyisi i kaobimaragasisi.

²⁴Kona maranai Jew biyina kana waba Apollos, Alexandria sebare, i botu ku Ephesus. Kona wai sebare kuikuirina, Wara Gairenai i kuira kabitamni, ba ana sisiya kaimasavisi wata.

²⁵Bada ana keta i kaobibeyei wai pipiya mutusi kurisi, ere tepatorana Iesu kairavina i beyebeyena ba i sisiyana kabikabitamni, saba John ana babataito wata i kuiri.

²⁶Maranai Priscilla ba Aquila si nonori Jew biyisi asi dugu yovena, kamonai ere tepatorana i raumamara wai, si taina sirei asi ku yove ba God ana keta basuna damana si beyena kabitamni.