Acts 17:7-34

⁷Jason-el renh-atherr arntarnt-arek. Rernem anwenhantherr ilek, ‘Jesus Atyetyart ilkwa aneyel.’ Alakenh rernem Atyetyart anwekantherrenh Caesar-ek irrpelthirreyel.”

⁸Angka awek-penh, ingkerrenh anyentirrek, rernem ahelirrek-anem.

⁹Artwa ampwernemel-anem Jason ilek, man ra anthenhey-alpetyek. Ikwer-penhan renh-rnem iletyek-anem tyarlewek.

¹⁰Ingwa ikwerel-antey Jesus-arl apenteyel-rnemel Paul Silas-atherr Berea tawen-warl-anem thwenek. Berea ikwer-itwek ratherr Jew-rnem-kenh tyaty-warl alhek.

¹¹Jew Thessalonica tawen-areny-rnem arlkarirrenh. Berea-areny-rnem iylpareth-rnem anenh. Rernem inkwerelhek innga Paul-kenh angkek. Arlta arrpanenhel Akngey-kenh pip arrwekeleny reytemilek, rernem aretyek Paul-el apek renh-rnem arraty-angkwarr akalty-anthetyek.

¹²Jew akngerrel Jesus renh tnakek, arelh atyetyart Greece-areny Jesus renh tnakek arrpemarl Greece-areny artwernemel-then.

¹³Jew Thessalonica-areny akngerrel awek-penh Paul-el tawen Berea-itwek Akngey-kenh angka innga akalty-anthek, rernem Berea-warl-anem alhek. Rernem irrwernek.

¹⁴Alakenh-anyem Jesus-arl apenteyel akngerrel Paul renh anamerl-antey thwenek ament kwaty alay-angkwarr arntarnpenhemel alpetyek ingwer-rnem-kety Silas Timothy-atherr apmer Berea-el-antey anenh.

¹⁵Artwa akngerr ingwer-rnem rernem Paul-atherr-angkwarr ilkwatherr alhek rernem renh Athens tawen-warl artengewek. Rernem alpey-angenh-antey, Paul-el renh-rnem ilek Silas-atherr anamerl ikwer-warl apey-alpetyek.

¹⁶Paul Silas ratherr Athens-itwek mpwelhenh ingkart-arrpantey mpwarekarl akngerr, ranem ahelirremel arey-alhek.

¹⁷Alakenh-anyem ra tyaty-itwek Jew akngerr-itwek angkerrenh Greece-areny-rnem-itwek, rernemarl Akngey innga arraty iterl-arenh. Arlta arrpanenhel apmer-areny-rnem-itwek angkerrenh, tawen ampep-itwek.

¹⁸Artwa irrpety ingwer-rneman Epicurus ikwer kwertengerl anenh, artwa irrpety ingwer-rneman Zeno-kenh kwertengerl anenh. Paul-then artwa ingwer-rnem-then rernem angkerrenh, “Artwa arwengk ilenhelan irrtywerremel anwenhantherr ileyel. Ilekek ra anwenhantherr ilem?” Irrpety ingwer-rneman alakenh angkek, “Ra ingwer-rnem-kenh Akngeyek angkeyel.” Rernem alakenh angkek. Paul-el renh-rnem Jesus-kenh angka akalty-anthek, “Jesus ipmepenh akemirrekarl.”

¹⁹Artwa rernem Paul renh akngek Areopagus Council-warl. Rernem renh ayernek, “Ntwa apek anwenhantherr ilem angka renh ntwarl akngerr akalty-antheyel?”

²⁰Rernem ilkwerl-alhek, “Angka aleyantarl anwenhantherr awek.” Rernem Paul renh ilek, “Lyertant anwantherr awek angka renh anwekantherr anayntila!”

²¹Athens-areny-rnem akngerr arlta arrpanhenhel angkek awelherlenty-akngenh, angka ingweram-ingwer ikwer-penh angkerretyek.

²²Paul akemirrek Areopagus Council ikwer-rnem-warl, rap angkek, “Artwa Athens-areny-rnemay, atha areyel arrantherr altyerr akngerr-akert aneyel.

²³Ayeng tawen-angkwarr alhenhel, athan arek altyerr-arrpantey ingwerek-ingwer arrekantherrenh. Anyent ingwerekant arrantherr ikwer akwerrp-antey aneyel. Akngey inngarrpantey arrantherr apentenh apalel, arrantherr iterremel altyerr renh-arrpantey, iltyelarl mpwarek gold-penh. Akngey innga ikwer-penh atha arrekantherr iletyek.

²⁴Akngey anyent innga ra alker-then ahern-then arrpmernek, arwerl-rnem-then atnwenth-rnem-then artwernem-then ingkerrenh-antey. Ranem ingkerrenhek Ingkart aneyel. Akngey warl iltyel mpwarekarl-itwel nthakenh aney-angenh.

²⁵Akngey anyent innga ingwerel renh nthakenh iley-angenh. Rant ingkerrenh itethilem renh-rnem amern-then anthem, ingkerrenh-antey.

²⁶Artwa anyent-they ingwerek-ingwer arrpmernek, ranem renh-rnem arlperrtyilek. Ra anyentel-anyentel apmer renh-rnem antheynek. Ra ikwer-rnem akalty apmer nthenh-ampenyel rernem aneyel, ilengerarl rernem ywerreyenh.

²⁷Akngey ingkerrenhek anayntelhilek, rernem ikwer nthwetyek, renh iterl-aretyek. Akngey ra anwekantherr-itwek arrer aneyel.

²⁸‘Ra anwenhantherr iteth atnyenem, rlterrkilem, arntarnt-arem.’ Artwa anyentel ilek, ‘Anwantherr alerikw ikwerenh ingkerrenh aneyel!’

²⁹Anwantherr Akngey-kenh alerikw-rnem aneyel. Nthakenh iterrey-angenh Akngey anwekantherrenh gold-penh thilp-penh mpwarey-angenh, apwert-penh mpwarey-angenh.

³⁰Awank-akerran alhenh ament-warl-tangkwel, Akngey iterl-arey-angenh. Akngeyel renh-rnem menty atwey-angenh arntarnt-arenh. Aley-anem ra ilkelheyel ingkerrenh ikwer-warl-anem angkepirretyek.

³¹Ra kel akalty arlta ikwerel-antey ra ingkerrenh-antey arraty innga akngakeyenh. Ra artwa anyent rlwanek, ingkerrenh-they akngakeyenh. Anwantherr akalty ra arraty innga anem, rarl artwa renh ipmepenh akemelhilekarl.”

³²Rernem awek-penh Akngeyel artwa anyent ipmepenh akemelhilek, ingwer-rnem atherrek, ikwer irrpelthirremel. Ingwer-rnemel Paul renh ilek, “Ingwer-ingeran anwantherr ngkweng awelhetyek arrpemarl.”

³³Paul Areopagus Council-they alpekant-anem.

³⁴Artwa irrpetyel angka ikwerenh renh tnakek, kel renh ingkern-they apentek, alhek ikwer-angkwarr. Artwa anyent itnan Dionysius Areopagus Council-areny anenh. Arelh anyentel itnan Damaris ingwerel-rnem-then Ingkart renh tnakek-anem.