Acts 17:4-17

⁴Jew biyisi mutusi si nonora wai Paul ba Silas si sununurisi ba Greek biyisi God si bo pepetei ba bibaine babadisi mutusi si geruwana.

⁵Saba Jew biyisi mutusi si nuwarauwa, wai pipiya botabira bitasi bigimona gawarinai si runotuwanisi ba si kokona si gweagwea ba si dadaura. Si riu Jason ana ku yove wai Paul ba Silas si nuwenuwenisi sita taina seserisi sita kasibau pipiya kurisi.

⁶Ba maranai kega si pananisi wai Jason ba bigeruwana biyisi mutusi si taina seserisi si kasibau baibuibuiya biyisi kurisi. Ba si parapara, “Paul ba Silas dobu ereonowana te resoresoi. Ba yebo karaku niko meyagai te resoresoi.

⁷Ba Jason yebo i enoenovisi ana ku yove. Nikosi pipiya Caesar ana kairuwana te bikasikotobi, te wonawona kata kosi taupauma bauna te bigeruwei, kana waba Iesu.”

⁸Maranai nikosi si nonori wai pipiya ba bibuibuiya biyisi yabata si negenegeisi.

⁹Damanina Jason ba bigeruwana biyisi mutusi si gwabisiya mane si yauni ba si wonisi kega sita wose meyei ba si boterisi si nae.

¹⁰Kona pomnai bigeruwana biyisi Paul ba Silas si poraisi ku Berea. Si verakasibau wai si vera damana Jew biyisi asi ku dugu yovena.

¹¹Berea biyisi nuwanuwasi bobotaveyisi kega bage Thessalonica biyisi ba Paul Wara Gairena i sisiyei wai si nonora kabikabitamni. God wonana mara patepatena si baibaiyavi wai si kita bikuikuiri kata Paul asi bibeyebeyena wai wona damana kona kega.

¹²Kona kairavina Jew biyisi pesarisi ba Greek babadisi sebasebare pesarisi ba bibaine yebo pesarisi si geruwana.

¹³Saba maranai Jew biyisi mutusi Thessalonica kamonai si bopanani kata Paul Wara Gairena Berea kamonai i raumamarei wai, si nae ba namai si dagui si bikupura resoreso Berea biyisi kamosiyai.

¹⁴Bigeruwana biyisi si bokwayo yagina Paul si porai ku tore ba Silas ba Timothy Berea kamonai si mana.

¹⁵Pipiya Paul si urabai si nae ku Athens, wai si veramaga ku Berea ba Silas ba Timothy si wara berisi kata yagiyagina sita nae Paul kurina.

¹⁶Maranai Paul Athens yai i potapotaisi, wai meyaga kamonai tarabibisaka i bonuwa i kinana wai nuwanuwana i yara.

¹⁷I nae Jew biyisi asi ku dugu yovena ba Jew ba Greek biyisi God te bo pepetei wai pipiyisi yabata si bisisiya, ba kao patepatena yebo gimona gawarinai pipiya namai si mamana wai kurisi i bisisiya.