Acts 17:14-31

¹⁴Maratagogi kerisiana Paul i paritawanei au gera wate Sailas ma Timothy au Berea provins i mae.

¹⁵Ma nelara Paul i tauvigwanigwaniei da au Athens, ma Paul nelarai i riwei ma i paritawanei au Berea da Sailas ma Timothy ita riwei da laḡilaḡina ita nei awarina.

¹⁶Ma Paul au Athens ana rava i paipaini, ma i ʼnanai da kampa kokoitau i maḡa kaua ma i vinuabola kaua.

¹⁷Mai Jew ma mai Greek God tauviborumeina awari i jima guratana au pari numana ma nanare au deba, aiai da i ḡeta ma i rautaniḡana.

¹⁸Ma rava ḡelaui nuaulaulai i ḡetai ma maiteni i vitarapiri, taui e ḡoreḡorei mai Epicure ma mai Stoic, taui lawana ai kaua tauviararamanai. Ma ai rava ḡelaui i paridadana, “Wei ravana aiwai e voḡavoḡanei?” Ḡelaui i riwa, “Mepa da tauna dobu ḡelaui ai god e bababaniei.” Taui wenanare i babani aubaina Paul Iesu Riwana Aiaina ma ana iraḡe ma ana vomairi me, i raugugulei.

¹⁹Ma i taravaini ma i naiei ai au boru e ḡoreḡorei Areopagus ma i riwei, “Ma nei ma a ḡoei da am viararamanana vouna e bababaniei, ata aramanei.

²⁰Kaua ḡelaui e babaniei tauai a vivinuanainei, ma a ḡoei da ana aramanei anona aiwai?”

²¹(Taumana ma mai Athens marana patapatai ai nola eḡa aiwai, da kaua voui ina virarautuei ma ina nononori.)

²²Ma Paul babadai au naoi i mairi ma i riwa: Dogadogara mai Athens! A inana da taumi vipatupatutumi ami god awarii,

²³A bababara ma ami pulo aniapunana a inainanai, ma tagogi a inanai au tepana i giruma, “Wei God eḡa ata araramaneia aubaina.” Wei Godna o viviborumei wate eḡa ota aramanei. Tau ana riwemi nai Godna aiai.

²⁴Tauna God mara ma dobu ma aiwai anatapuna au orana i kauei. Ma tauna mara ma dobu badana, ma numa rava uranei e voavoai au orana eḡa ita mamae.

²⁵Ma eḡa rava ai agu ita paipaini, tauna agu eḡa ita ḡoeḡoei. Aubaina tauna rava lawana ma lavutu ma anatapuna e vereverei.

²⁶Au karena rava tagogi i kauei ma nai ravanei dam patarai i vitupua ma dobu i maeni. Tauna ainelana rava ai mara i terei da ina mae ma ina iraḡe ma animae paratana i aiterei.

²⁷God wenanare i kauei da rava tauna ina baiei da mepa ina nelaḡai. Wate tauna au ḡereḡereta, eḡa au uama.

²⁸Taugiruma ḡelauna Greekei i riwai pa, “Taunei ta mamae ma ta bababara ma anatapuna ta kaukauei.” Ma wate ami taugiruma ḡelauna i girumi i pa, “Tauai nanare tauna natunatuna.”

²⁹Ma tauta God natunatuna, eḡa tana notai da God lamna me kokoitau, goldei bo silvei i kauei. Rava uraiei ma ana nuaulaulauei i kauei.

³⁰Wariaḡa rava God eḡa ita aramanei wate God taui i ʼnana-tawanei, wate marina anataputa egaegarita da tana rupena ma tana mae-tavireta awarina.

³¹Aubaina mara i vinei maranai rava anatapui aiainei ma jijimaninei ina kovoḡi. Rava i vinei da taunei ina kovoḡa. God wei ravana iraḡelei i vovaimairini lamna ina vimataira rava awari da ravana anina tauna.