Acts 16:8-34

⁸Ma Maisia i verautuini da i nae au Troas.

⁹Waguvaraina Paul ana au inana i ʼnanai oroto Macedoniei i maimairi ma i vivibaḡai i pa, “Ma damanai au Masedonia da ma voaguiai!”

¹⁰Paul ana rauboni au murina tauai a vioga da laḡilaḡina ana vomairi Masedonia provins aubaina. Tauai a vitumaḡana da God i ḡorelai da Riwana Aiaina kampa ana jimei.

¹¹Au Troas tauai amkuka, a viaruana damana au Samotreis bonabonana a ḡeta ma au pom ḡela a kuka-nae au Neapolis.

¹²Ma kampa da a babara nae au Philipai taon au Masedonia provins, weka mai Rome ai sorodia ai bareki ḡaeḡaena i mae, kampa a veraumae.

¹³Ma au Sabate taon a opu-tawanei ma a nae au waira, a notanotai da kampa boru gabuna wate eḡa. A kiala ma waivine ruaḡa ota kampa i rauriei awari a babani.

¹⁴Taurautaniḡana tagogi lamna Jentail wavinena wavana Lidia ma ana dobu Thaiataira. Tauna gara lebalebarina maiana ḡaeḡaena taugimareina ma God i vitumaḡanei, ma God orana i votawanei da aiwai Paul i bababaniei i rautaniḡanana kauei.

¹⁵Maranai wavine ana numa ravai i babataito ma i rauḡorelai i pa, “Ona nei au numa mepa da o notanotai da tau kerisiana ririwa kauana.” Ma i egariai da ana au numa a mae.

¹⁶Mara tagogi a nenae boru au gabuna ma taunola guguini a nebelei, Tauna au orana arua apoapoena i mae ma lamnei aiwai amapo da ina tupua i vivieḡai. Ma mane ḡaeḡaena i kaukauei ana taniwaga aubaina.

¹⁷Tauna Paul ma tauai i votaḡotaḡoiai ma i garagarara “Wei nelarai God ḡeḡetelarana ana taunola! E vivinolanola menanare God e vivilawananei.”

¹⁸Wei kauana i kauei au pom biaḡa da Paul i viamlo-ḡaiḡaini da i mae-tavirei ma arua apoapoena i riwei, “Iesu Keriso wavanei a egaegarim da wavine ma opu-tawanei!” Maratagogi arua apoapoena wavine i opu-tawanei.

¹⁹Maranai taunola guguini ana taniwaga i aramanei da ai mane etanaina i vine-boai, taui Paul ma Sailas i vojijini ma i taina naiei au deba Gabemani awarii.

²⁰Taui i nei ai taurauetara awarina ma i riwa, “Wei nelarai mai Jew wei dobuna ravai e vivinuaraḡaraḡai.

²¹Taui ata rava kaua ḡelaui e viviararamani ma wei ata giu e teretereḡairei.”

²²Ma patara i rui Paul ma Sailas vunuai aubaina. Ma gabemani Paul ma Sailas, ai gara i sikai ma wipiei i kwapui.

²³I vunu-kauei ma i tawana-ruiei au panipani numana. Ma numana badana i egari da ita paina-kauei da eḡa ita ruba.

²⁴Anina ma Panipani badana taui i tawana-ruiei, panipani numana au orana ma aei, ai vivitainei au orana i raḡita-jijini.

²⁵Nubautuvai Paul ma Sailas i raraupari ma i welawela God awarina ma panipani ḡelaui i rarautaniḡana.

²⁶Nanare ma lolo ḡaeḡaeotana dobuna i gui. Ma maratagogi pani numana metaetana i wana-tawatawanei ma panipani anatapui ai sein i dabarara.

²⁷Pani numana badana i vomairi ma ita inanai da metaeta wanatawanana ma i notai da panipani i ruba ma lamna aubaina ana sod i lavui da ita viraḡena-melei.

²⁸Wate Paul i garara, “Eḡa ma vunu-melem! Tauai anatapuai weka!”

²⁹Pani numana badana ana taunola i ḡorei da lalalaina ita neiai ma i ruba-rui ma ana sisisina i mae-peu Paul ma Sailas au naoi.

³⁰Ma i opunei au doa ma i paridadanei, “Babada aiwai ana kauei da ana lawana?”

³¹Taui i paribelei, “Bada Iesu Keriso ma vitumaḡanei ma ma lawana, am numa ravai maiteni.”

³²Ma God riwana i raugugulei tauna ma ana numa ravai awari.

³³Nai maranaina avena da waguvarai, pani numana badana Paul ma Sailas i naiei ma keroi i oḡai, Ma maratagogi tauna, ana numa ravai maiteni i babataito.

³⁴Paul ma Sailas i ḡaiei ana au numa da i viambagibagi. Tauna ana numa ravai maiteni i vinuaiai kaua da marina God i vitumaḡanei.