Acts 16:22-40

²²Artwa akngerr akarrirrek Paul renh-atherr ayntarrp-iletyek. Atyetyart court-areny rernem ahelengkw-rnem ilanthek Paul-atherr Silas-atherr arnkwa lheletyek, whip-el atwetyek.

²³Rernem renh-atherr artewentyel atwekarl-penh, rernem renh-atherr tyayl-warl-anem akwernek. Rernem tyayl-areny artwamp ilanthek, renh-atherr mwantyel arerl-ayntetyek.

²⁴Alakenh-anyem tyayl-areny artwampel-rnem renh-atherr tyayl kwen inngewarl akwernek, arlaw atherr-anem tyeynel arertnek.

²⁵Ingwa ampepel Paul-atherr Silas-atherr Akngey-warl angkek Akngey tnakemel aylelhemel. Tyayl-areny ingwerel-anem renh-atherr awek arrpemarl.

²⁶Ahern ranem artewenty innga akngelhekarlel, tyayl renh akngenhelhilek arrpemarl. Tyayl arriw ingkerrenh altywerirrek, tyeyn lhelhek ingkerrenh-they.

²⁷Tyayl-areny atyetyart artwamp ranem atyekirrek, ranem arek tyayl arriw altywerirrekarl. Ra iterrek tyayl-areny-rnem ingkerrenh anterrenty-arrpantey. Alakenh-anyem ra nayp arlpenty inek, ipmek atwelhetyek antwerrel.

²⁸Paul-anem ikwer arlkek, “Ipmek atwelhey-angenh, anwantherr ingkerrenh nhel aneyel-antey, tyerrelhey-angenh!”

²⁹Tyayl-areny atyetyart ranem lyenentyek yangkelhek arlkemel, ra anaynt aretyek. Ranem tyayl ikwer-warl aylpek. Ra aterirrek innga, Paul-atherr-kety, Silas-atherr-kety. Ampwethel arrernelhek kwenirremel.

³⁰Akemirremel ra renh-atherr aketh-warl atnwenhek. Ra renh-atherr ayernek, “Artwamp atherray! Nthakenh athan ilem, ayenh Akngeyel itethiletyekan?”

³¹Ratherr-anem ilek, “Ingkart Jesus tnakay! Ikwer-penhan Akngeyel ngenh itethileyenh ngkwenh-rnem-then warrkenh ngkwenh-rnem-then ingkerrenh-antey.”

³²Tyayl-areny artwamp ra Paul Silas-atherr atnwenhek warl ikwerenh-warl. Ikwer-penhan Paul Silas ratherr renh Akngey-kenh angka akalty-anthek warl-areny ingwer-rnem-then ingkerrenh-antey,

³³Tyayl-areny artwamp ra tywen renh-atherr anterel apernek, mwerriletyek. Ikwer-penhan Paul-atherrel renh baptise-emelek, ikwerenh-rnem-then warrkenh-rnem-then ingkerrenh-antey.

³⁴Ikwer-penhan tyayl-areny artwamp ra renh-atherr apmer ikwerenh-warl atnwenheynek, renh-atherr amern anthetyek. Tyayl-areny artwamp inkwerelhek ikwerenh-rnem-then ingkerrenh-antey Akngey tnakemel.

³⁵Kel ingwepenh-antey Atyetyart court-areny rernem iltyemwerney-rnem thwenek angkakert angka tyayl-areny atyetyart ikwer-warl. “Artwa renh-atherr kel tyarlewetyek!”

³⁶Tyayl-areny atyetyart ranem Paul renh ilek, “Atyetyart court-arenyel angka thwenek, mpwelenhanth tyarlewetyek. Mpwelanth-anem arternp alpenherr-atherr aterirrey-angenh.”

³⁷Paul-el angkakert-rnem thwenek, “Rernem aylenhanth arrwekel court-emiley-angenh-antey. Aylanth arlarl, Rome-areny arrpemarl. Rernem aylenhanth whip-el atwek akngerr-itwek, tyayl-warl akwernemel. Lyert-anem rernem arrkernelheyel aylernanthenh anyelkel tyarlewetyek. Arrangkw-kety alha! Rernemarrp apetyey tyayl-they aylernanthenh tyarlewetyek.”

³⁸Iltyemwerney angkakert-rnem alpek angka court-areny-rnem iley-alpek. Atyetyart court-arenyel awek Paul Silas-atherr Rome-areny arrpemarl anenh, rernem aterirrek.

³⁹Tyayl-warl alhemel rernem renh-atherr arternpilek, renh-atherr tyayl-they tyerrek. Ikwer-penhan rernem renh-atherr ilek, apmer ingwer-warl-anem alhetyek.

⁴⁰Tyayl-they tyerrelhemel Paul Silas-atherr Lydia-kenh apmer-warl alhek. Jesus-arl apentenh akngerr apmer ikwerel anenh arrpemarl. Ratherr ikwer-rnem Akngey-kenh angka ilek warl ikwer-itwek, renh-rnem rlterrkilemel. Ikwer-penhan ratherr kel alpekant-anem.