Acts 16:11-16

¹¹Troas-itwek anwernantherr rtnwewarl nganek. Anwernantherr Samothrace ikwer-warl artarnpenhek. Ikwer-penhan arlta ingwerelan Neapolis ikwer-warl-anem.

¹²Tawen ikwer-they anwernantherr ingkel-anem alhek apmer Philippi-warl. Philippi ra tawen ilkwa anenh apmer Macedonia-itwek. Tawen ikwer-itwek Rome-areny akngerr anenh. Tawen ikwer-itwek anwernantherr arlta irrpety-inger anenh.

¹³Arlta Saturday ikwerel anwernantherr tawen ikwer-they anperl-alhek, lher kwaty-akert-warl. Anwernantherr iterl-arek kwaty-angkwarr lher ikwer-itwek Jew-rnemarl akarrirrenh Akngey-warl angkayntetyek. Apmer-itwek anwernantherr aney-alhek. Anwernantherr-anem arelh akngerr-itwek angkerrenh.

¹⁴Arelh anyent rarl Paul awenh, itnan Lydia. Thyatira tawen-arenyarlap ran. Ra arnkwa mwerr-angker rnter-rnter payemelenh ingwer-rnem-warl tharlemilenh. Lydia ra Akngey-angkwarr apentenh. Ingkartel iylpa ikwer altywerilek, ra Paul arraty awetyek, Akngey-anem tnakemel.

¹⁵Paul-el-anem renh baptise-emelek, ikwerenh-rnem-then. Ikwer-penhan Lydia-el anwernenhantherr ikngwerl-alhek, “Arrantherr iterl-areyel, athan Ingkart innga tnakeyelarl. Kel apetyenherr-arey, apmer atyenhel anetyek.” Anwernantherr kel ikwer inkwerelhek, apmer ikwerenhel-anem anenh.

¹⁶Arlta ingwerel anwernantherr apmer irrkaty ikwer-warl-antey alhek, Jew-rnemarl tyatyek akarrirrenh-warl, Akngey-warl angkayntetyek. Kwey aleyak warrkenhel anwernenhantherr arek. Ra arrenty-akert anenh. Arrenty-kenh rlterrk-akertel ra arrwekel-antey ilenh nthakenharl irreyenh, ngangker-apeny. Kwey warrkenhel renh-rnem ilenh. Ingwerel-rnem renh man anthek, angkan ra tyakarl arrwekel-antey ilenh, nthakenh irreyenh. Alakenh-anyem atyetyart ikwerenh-rnemel man akngerr mpwarenh ikwer-they.