Text copied!
CopyCompare
Alyawarr Bible - Acts - Acts 15

Acts 15:9-30

Help us?
Click on verse(s) to share them!
9Ranem Jew-weny-rnem-kety apmwan iwek rernem renh tnakenty, rarl anwekantherrety apmwa iwek-apeny. Anwantherr renh tnakem aleth-antey.
10Ilek-ketyarl arrantherran awerr aneyel ikwer-rnem, rernem Akngey-kenh angka apentekerran? Iterl-aray, anwantherr Moses-kenh angkek ywarn apentetyek arrkernelheyel. Arrwekeleny-rnem ywarn arrkernelhenh arrpemarl.
11Akngeyel ingkerrenh anwenhantherr atnyenem, anwekantherr inkwerelhemel anwantherrarl Jesus tnakenty, Jew-rnem-then, Moses-kenh angka iterl-arey-angenh-rnem-then.”
12Barnabas Paul-atherr angkenharl tyaty-arenyel-rnem renh-atherr akatemel awenh. Ratherr renh-rnem ilek Akngeyelarl renh-atherr rlterrkilek, ilek-ilek mpwaretyek, arntety-rnem mwerriletyek, Jew-weny-rnem-itwek.
13James-el-anem ilek, “Atyenh-rnem, atyeng-anem awelhenherr-arey!
14Simon-el ayenh ilek, ‘Akngeyel renh-rnem arrwekel rlwanek, rernem ikwer-areny-rnem-anem anetyek.’
15Akngey-kenh angkakert arrwekeleny-rnemel ilerl-apenh, alakenh arrpemarl. Akngey-kenh angka arrwekeleny alakenh-anyem aynteyel.
16Ingkart ra angkek, ‘Ingwer-ingeran ayeng apey-alpeyenh, atha David-kenh-rnem akngerriletyek, rernemarl irrpetyapant aneyel-kety.
17Ikwer-penhan Jew-weny ingwer-rnem Ingkart-warl-anem angkepirreyenh, Ingkartel renh-rnem arrwekel rlwanek-angkwarr.’
18Ingkart ra awank-antey alakenh angkek.
19Alakenh-anyem anwantherr arrkngert angkey-angenh, rernem menty Akngey-warl angkepirretyek.
20Anwantherr ikwer-rnem ingkwernetyek pip ikwer-rnem-warl thwenetyek, rernem angka arraty iterl-aretyek. Anwantherr mwerrant-arey anayntetyek, Moses-kenh angka arrwekeleny aynteyel-angkwarr, rernem irrtywerremel altyerr-arrpantey-rnem-itwek tyenkerr amern-then aker-then arlkwey-angenh anayntetyek, rernem ingwer-kenh anew ikngwey-angenh anayntetyek, rernem aker arrkngangketyarr arlkwey-angenh anayntetyek, arrknga antywey-angenh anayntetyek.
21Aray, awank-they apmer arrpanenh-itwek Moses-kenh angkangkwarr akalty-anthenh. Rernem arlta Saturday arrpanenhel anyentel-anyentel reytirrek Jew-rnem-kenh tyaty akely-rnem-itwek.”
22Ikwer-penh angkakert-rnem-then arntarnt-arey-angker-rnem-then tyaty-areny ingkerrenh rernem artwernem-anem rlwanek, Paul Barnabas-atherr-angkwarr Antioch tawen-warl alhetyek. Judas itna ingwer Barsabbas-an. Artwa ingweran Silas.
23Kel rernem pip ingkwernek thwenetyek ikwer-atherr-angkwarr. Rernem alakenh ingkwernek pip-warl, Antioch tyaty-areny-rnemek, “Atyenh-rnem, Jesus-arl apenteyel-rnem akngerr, angkakert-rnem-then tyaty-areny atyetyart-rnem-then! Arrantherrarl Jew-weny-rnem, arrantherr Antioch tawen-itwek aneyel apmer Syria-el apmer Cilicia-el-then.
24Anwantherr awek ingwer-rnemarl arrekantherr irrpelthirreyel. Anwantherr awek artwa tyaty-areny irrpety arrekantherr-warl alhek, rernem-anem arrenhantherr ilpertiley-alhek. Anwernantherran renh-rnem thweney-angenharl, anwernantherr arlarl.
25Anwernantherr angkerrenh, Barnabas-atherr Paul-atherr ingwer-rnem-then arrekantherr-warl thwenetyek. Anwernantherr Barnabas Paul ikwer-atherr inkwerelhemel.
26Ingwer-rnem ikwer-atherr irrpelthirrenh, irrwampenh anthenh, ratherrarl Jesus Christ-kenh angka ilerl-apenhek.
27Anwernantherr-anem Judas-atherr Silas-atherr ikwer-atherr-angkwarr thwenem. Rernem pip ikwer-penh angka anayntilem, angka anyent renhey-antey.
28Itnweng Rlwartel ra anwekantherr ilek, arrekantherr angka irrpetyapant anayntiletyek.
29Arrantherr amern-then aker-then arlkweyang anetyek, ingwer-rnemel altyerr-arrpantey tyenkerr anthekarl-kety. Arrantherr arrknga antyweyang anayntetyek aker arrkngangketyarr. Arrantherr apmwel-areth mpwarey-angenh, ingwer-kenh anew ikngwey-angenh. Arrantherr mwerr-angkwarr anetyek, nhekant awelhemel.”
30Tyaty-areny-rnemel artwa renh-rnem thwenek, apmer Antioch-warl. Rernem Antioch tyaty-areny-rnem akarrilek. Pip-anem rernem anthek. Artwa anyentel-anem reytemilek.

Read Acts 15Acts 15
Compare Acts 15:9-30Acts 15:9-30