Acts 15:8-22

⁸Akngey kel ingkerrenhek akalty. Akngey kel lwewarrernelhek Jew-weny-rnemek. Ikwer-rnem inkwerelhek ra anwekantherr inkwerelheyel-apeny. Akngeyel Itnweng Rlwart renh ikwer-rnem-warl thwenek, anwekantherr-warl thwenek-apeny.

⁹Ranem Jew-weny-rnem-kety apmwan iwek rernem renh tnakenty, rarl anwekantherrety apmwa iwek-apeny. Anwantherr renh tnakem aleth-antey.

¹⁰Ilek-ketyarl arrantherran awerr aneyel ikwer-rnem, rernem Akngey-kenh angka apentekerran? Iterl-aray, anwantherr Moses-kenh angkek ywarn apentetyek arrkernelheyel. Arrwekeleny-rnem ywarn arrkernelhenh arrpemarl.

¹¹Akngeyel ingkerrenh anwenhantherr atnyenem, anwekantherr inkwerelhemel anwantherrarl Jesus tnakenty, Jew-rnem-then, Moses-kenh angka iterl-arey-angenh-rnem-then.”

¹²Barnabas Paul-atherr angkenharl tyaty-arenyel-rnem renh-atherr akatemel awenh. Ratherr renh-rnem ilek Akngeyelarl renh-atherr rlterrkilek, ilek-ilek mpwaretyek, arntety-rnem mwerriletyek, Jew-weny-rnem-itwek.

¹³James-el-anem ilek, “Atyenh-rnem, atyeng-anem awelhenherr-arey!

¹⁴Simon-el ayenh ilek, ‘Akngeyel renh-rnem arrwekel rlwanek, rernem ikwer-areny-rnem-anem anetyek.’

¹⁵Akngey-kenh angkakert arrwekeleny-rnemel ilerl-apenh, alakenh arrpemarl. Akngey-kenh angka arrwekeleny alakenh-anyem aynteyel.

¹⁶Ingkart ra angkek, ‘Ingwer-ingeran ayeng apey-alpeyenh, atha David-kenh-rnem akngerriletyek, rernemarl irrpetyapant aneyel-kety.

¹⁷Ikwer-penhan Jew-weny ingwer-rnem Ingkart-warl-anem angkepirreyenh, Ingkartel renh-rnem arrwekel rlwanek-angkwarr.’

¹⁸Ingkart ra awank-antey alakenh angkek.

¹⁹Alakenh-anyem anwantherr arrkngert angkey-angenh, rernem menty Akngey-warl angkepirretyek.

²⁰Anwantherr ikwer-rnem ingkwernetyek pip ikwer-rnem-warl thwenetyek, rernem angka arraty iterl-aretyek. Anwantherr mwerrant-arey anayntetyek, Moses-kenh angka arrwekeleny aynteyel-angkwarr, rernem irrtywerremel altyerr-arrpantey-rnem-itwek tyenkerr amern-then aker-then arlkwey-angenh anayntetyek, rernem ingwer-kenh anew ikngwey-angenh anayntetyek, rernem aker arrkngangketyarr arlkwey-angenh anayntetyek, arrknga antywey-angenh anayntetyek.

²¹Aray, awank-they apmer arrpanenh-itwek Moses-kenh angkangkwarr akalty-anthenh. Rernem arlta Saturday arrpanenhel anyentel-anyentel reytirrek Jew-rnem-kenh tyaty akely-rnem-itwek.”

²²Ikwer-penh angkakert-rnem-then arntarnt-arey-angker-rnem-then tyaty-areny ingkerrenh rernem artwernem-anem rlwanek, Paul Barnabas-atherr-angkwarr Antioch tawen-warl alhetyek. Judas itna ingwer Barsabbas-an. Artwa ingweran Silas.