Acts 15:28-34

²⁸Itnweng Rlwartel ra anwekantherr ilek, arrekantherr angka irrpetyapant anayntiletyek.

²⁹Arrantherr amern-then aker-then arlkweyang anetyek, ingwer-rnemel altyerr-arrpantey tyenkerr anthekarl-kety. Arrantherr arrknga antyweyang anayntetyek aker arrkngangketyarr. Arrantherr apmwel-areth mpwarey-angenh, ingwer-kenh anew ikngwey-angenh. Arrantherr mwerr-angkwarr anetyek, nhekant awelhemel.”

³⁰Tyaty-areny-rnemel artwa renh-rnem thwenek, apmer Antioch-warl. Rernem Antioch tyaty-areny-rnem akarrilek. Pip-anem rernem anthek. Artwa anyentel-anem reytemilek.

³¹Angka renh awemel tyaty-areny-rnem inkwerelhek, angka mwerr-angkerarl reytemilekek.

³²Judas-atherr Silas-atherr ratherr Akngey-kenh angkakert akalty atherr anenh. Ratherr-anem Jesus-arl apenteyel-rnem akngerr akalty-anthek rlterrkilemel-anem.

³³Ratherr arleng-alenty aney-alhek. Ikwer-penhan Jesus-arl apenteyel-rnemel Antioch-areny-rnem thweney-alpek Jerusalem-warl,

³⁴Paul Barnabas-atherr Antioch-el anenh. Ratherr renh-rnem Akngey-kenh angka akalty-anthek, ikwer-rnem anayntilek angka renh. Ingwer-rnemel angka akalty-anthek arrpemarl.