Acts 14:9-20

⁹Me motoyil ko thin ni be weliy Paul. Me guy Paul nike mich Jesus u wan’ nrayag ni ngan golnag ko m’ar rok, ma aram me changar Paul ngak

¹⁰me non ni ba ga’ laman ni ga’ar, “Mu sak’iy ngalang!” Me og fare mo’on ngalang ngi i yanyan.

¹¹Ma fa’ani guy fapi girdi’ ni aram urngirad e n’en nike rin’ Paul, miyad tabab ko tolul nthin rorad nu Lykaonia ni lungurad, “Pi kan e kar boded e girdi’ karbad ngodad nga but’!”

¹²Miyad tunguy ngachalen Barnabas ni Zeus, mi Paul e ra tunguyed ni Hermes, ni bochan e ir e en ni i welthin.

¹³Ma fare prist rok fare kan ni Zeus, ni bay e Tempel rok u wuru’ e re binaw nem, e fek boch e garbaw ni kabfos nge floras i yib nga langan e garog. Ye ir nge fapi girdi’ ni aram urngirad e yad ba’adag ni ngar pi’ed e maligach ngak fa gali apostel.

¹⁴Ma fa’ani rung’ag Barnabas nge Paul murung’agen e n’en ni nge rin’ e pi cha’nem, miyow guchthuy e mad rorow ngar milgow i yan nga fithik’ fapi girdi’ ni aram urngirad, ni yow be non ni ba ga’ lamrow ni be lungurow,

¹⁵“Pi cha’, mang ni ngam rin’ed e biney e pa’? Ya gamow l’agruw i girdi’ ni gamow bod gimed! Kug bow ngaray ni nggu weliyew ngak e girdi’ fare Thin Ni Bfel’ ni murung’agen Jesus, ma gamow pingegmed ngam pi’ed keru’med ko tin ndariyfan ngambad ngak fare Got ni be par nib fos, ni ir e ngongliy e tharmiy, nge fayleng, nge day, nge urngin ban’en ni bay u fithik’ e pin’ey.

¹⁶Kakrom e pag urngin e girdi’ ko pi nam i yan ngu’ur rin’ed e tin ni yad be finey.

¹⁷Machane gubin ngiyal’ ni be micheg ir u daken urngin e tin ni bfel’ ni be rin’, ya ma pi’ e n’uw ngomed u lang nge galwog u ngal’an; me ir e ma pi’ e ggan ngomed mma fal’eg lanin’med.”

¹⁸Mus ko pi thin ney ni weliy fa gal apostel ngorad ma ku be mo’maw’ rogon ni ngar talegew fapi girdi’ ni aram urngirad ni nge dab ra pi’ed e maligach ngorow.

¹⁹Ma boch piyu Israel nrabad u Antiok ni bay u Pisidia nge boch piyu Israel nrabad u Ikonium, e ra pingeged laniyan’ fapi girdi’ ni aram urngin ngar folgad ngorad ngar malang niged Paul, nge mu’ miyad girengiy i yan nga wuru’ e binaw, ni kar fineyed ni kem’.

²⁰Machane fa’ani mu’ulung e pi’in ke mich Jesus u wun’rad ngak, me sak’iy nge sul ngalan fare binaw. Me reb e rran riy miyow yan Barnabas nga Derbe.