Acts 14:5-21

⁵Ma mai Jew ma Jentail ḡelaui i vioga da Paul ma Barnabas ḡaimei ita viraurauei.

⁶Wate taui riwana i vaia ma dobuna i ruba-tawanei ma i nae au taon ḡaeḡaei Listara ma Derbi au Laikonia provins ma taon au ririvai.

⁷Ma weka Riwana Aiaina i jimana-naiei.

⁸Au Listara oroto aena ḡokokokarana, alona manawanei gwaḡagwaḡana i vinatunei ma eḡa ita babara dadana.

⁹Kampa i kiala ma Paul i bababani i rarautaniḡanei. Paul matana i tawanei ma i ʼnanai da tauna i vitumaḡana da ita lawana

¹⁰ma i garara awarina, “Aemei ma mairi!” Ma orotona aenei i mairi ma babara i vikarei.

¹¹Maranai patara i ʼnanai Paul aiwai i kauei taui ava ai ponei i babani vivira, “god ruaḡa i ḡairai awarita me rava.”

¹²Taui i riwa da Barnabas lamna mai Greek ai god Zeus ma Paul i vitauvibabani aubaina i riwa da tauna Hermes.

¹³Zeus ana pulo gabuna, taon au giana, Zeus ana pirisi patara maiteni bull ma berana ulaulai i neiai taon au metaetana da Apasol ita puloi.

¹⁴Wate maranai Paul ma Barnabas wei riwana i nonori, taui ai gara i sikai ma i ruba-opu patara awarii ma i garara,

¹⁵“Aiwai aubaina wei kauana o kaukauei? Tauai rava ota me taumi nanare! Tauai Riwa Aiaina a neneiai da nai kauai kwakwavi ona voterei ma ona nae Bada lawalawaina ona viborumei. Tauna mara ma dobu ma boga ma aiwai anatapuna au orai i kauei.

¹⁶Wariaḡa tauna rava i voterei da ai ḡoanei i mae.

¹⁷Wate marana patapatai e viviatataiemi da tauna e mamae ma ana nuavaina e verevereta, garewa marei ma maura ma lam e vereveremi ma au orami nuaiai e oaoai.”

¹⁸Apasol i bababani ma i kauana-guratei da ravai ita viḡaei da taui avena ita puloi.

¹⁹Mai Jew ḡelaui Antiok ei ma Ikoniamei i nei ma patarana i egari da Paul ḡaimei i viraurauei ma taonei i taina-opunei, i notai da tauna iraḡe.

²⁰Wate maranai vivitumaḡanai i ḡeta da i mae-kwaviviroi, tauna i vomairi ma i naeme au taon. Aupom ḡelauna tauna ma Barnabas i nae au Derbi.

²¹Paul ma Barnabas Riwana Aiaina i jimei au Derbi ma ekalesia voui maḡamaḡaui i rui. Ma i nae me au Listara, Ikoniam ma Antiok.