Text copied!
CopyCompare
Alyawarr Bible - Acts - Acts 14

Acts 14:18-27

Help us?
Click on verse(s) to share them!
18Innganem ratherr renh-rnem arternpilemel ilek.
19Jew-rnem Antioch tawen-they Iconium tawen-warl apetyek. Rernem-anem Iconium tawen-areny-rnem ilanthek, Paul renh apwertel wemel ipmek atwetyek. Apwertel wek rernem. Rernem ikwer iterrek renh ipmek wentyek-athen. Tawen-they aketh-ampeny-warl-anem iytarr-akngemel iwerl-alpek.
20Kwertengerl ikwerenh-rnem ikwer-warl apetyek. Paul ra akemirrey-ayntek. Paul ikwer-rnem-angkwarr tawen-warl alpek arrpemarl. Ingwepenh-anem Barnabas-atherr Paul-atherr Derbe tawen-warl alpek.
21Tawen ikwer-itwek-anem ratherr ingwer-rnem Jesus-kenh angka akalty-anthek, Jesus renh tnakemel. Derbe tawen ikwer-they Lystra tawen-warl alpek. Ikwer-penhan Iconium tawen-warl-anem Antioch tawen-warl alhek.
22Ratherr-anem kwertengerl-rnem rlterrkilek, renh-rnem ilek rernem Jesus renh tnaketyek aleth-antey. Ratherr renh-rnem ilek, “Aray, anwantherr artewentyel irrwampeyenh, Akngey-kenh ingkerrenh aneyel.”
23Paul Barnabas ratherr artwernem anyentarl-anyentarl arrerneynek, rernem tyaty-areny ingkerrenh arntarnt-aretyek. Ratherr amern arlkwey-angenh, Akngey renh ayernek, ra artwa arntarnt-arey-angker renh-rnem aleth-antey atnyenetyek.
24Paul Barnabas ratherr apmer Pisidia-angkwarr alhek. Pamphylia-warl apetyek.
25Perga tawen-areny-rnem Akngey-kenh angka akalty-anthek. Ikwer-penhan ratherr Attalia tawen-angkwarr-anem anper-alhek.
26Attalia ikwer-itwek rtnwewarl nganerl-alhemel, ratherr Antioch tawen-warl alpek. Antioch-arenyel-rnem Akngey renh ayernek, ra renh-atherr arntarnt-aretyek. Antioch-arenyel-rnem renh-atherr thwenek, angka mwerr-angker ilerl-apayntetyek ingwer-rnemek, rernemarl akwerrp anenh. Ratherr akwerrp ingwer-rnemek angka Akngey-kenh ilerl-apayntetyek. Ratherr kel warrk ikwer-atherrenh ywerrelhilek.
27Antioch-itwek ratherr Jesus-arl apenteyel-rnem anyentilek. Ratherr-anem Ingkart-areny-rnem ilek, “Aylanth Akngey-kenh angka Jew-weny-rnem akalty-anthenh, Akngeyel renh-rnem rlterrkiletyek, rernem Jesus renh tnaketyek.”

Read Acts 14Acts 14
Compare Acts 14:18-27Acts 14:18-27