Acts 14:10-23

¹⁰wai, Paul gamona kaikaponai i parara kurina ba i wona, “Kaemi yai ke msiri!” Damanina ba sebarena i bomsiri ba i dagui i yewoyewo neubuwa.

¹¹Maranai koroto Paul awaika i wosei si kinani wai, Lycaonia biyisi si dagui asi gamowai si parara, “Nikosi sebasebare ruwamo, wai god tupuwai si gakira kurita!”

¹²Kata Barnabas wai kona Zeus kosi Greek biyisi asi god, ba Paul wai Hermes kairavina kona wai sisiya woraworana.

¹³Zeus ana priest, ana puyo bunuwa gawarina wai meyaga kupunai i mamana, kata kona ba pipiya yabata bull mutusi ba saru gaigairesi, si yauna si botu ku meyaga matam ketana, asi waina Paul ba Barnabas kurisi sita puyobunuwa.

¹⁴Ba maranai Barnabas ba Paul nikona si nonori wai, kasi gara si rusika ba ere paraparasi si vera si riu koroto ku kamosi.

¹⁵“Awaika kairavina nikona ko wosewosei? Yakai wai pipiya mom, komi rutainimi! Yakai wai Wara Gairena kabi yoneyonei, kata ami wose goyogoyosi kamosi yai koni nuwabirabira, God yawayasina kurina, kona sapama ba dobu, enaga ba sawara ereonowana, kamonai te mamana wai tupana i wosisi.

¹⁶Kainaonai dam ereonowasi i boterisi asi wainai si yewoyewo.

¹⁷Ba mara kau ereonowana ana nuwayauyauna ebi beyimi nikosi matakirai kata kona wai emamana. Kata kusana kaidamonai e biporai ba mariya ba kam pesarisi, ebereberimi ba nuwasisira ebi bonuvimi.”

¹⁸Bagunai nikosi sisiya si sisiyana saba Lystra biyisi kega rubana sita boterei, ba asi waina sita puyobunuwa kurisi.

¹⁹Ba Jew biyisi mutusi Antioch ba Iconium yai si verakasibau ba koroto nuwanuwasi si taini. Paul akimai si gudai si nosi bage ita rabobo ba si taina seseri si kasibau meyaga ku kupana.

²⁰Saba bigeruwana biyisi si notuwei wai, i bomsiri ba i riu ku Lystra meyaga mena. Mara i tom wai kona ba Barnabas si nae ku Derbe.

²¹Kosi wona gairena si rumamarei ba pesarisi si geruwana. Ba muri yai si veramaga ku Lystra, ba Iconium ba ku Antioch mena,

²²bigeruwana biyisi si kaobimaragasisi ba si kaobitoraisi kata asi bitumaganai siti msi kikita. Si wona, “Kota, paiwara pesarisi tana paiwarana ba muri yai God ana ku basileiya tana riu.”

²³Paul ba Barnabas ekaleisiya yove taporo nununai, warawaretesi si bineisi ba si siya ba si rupariyisi, ba Bada kurina si terisi kata ita potaisi.