Acts 14:1-15

¹Kauana tagogina i tupua au Ikoniam. Paul ma Barnabas i nae mai Jew ai au boru numana ma menanare i babaninei da mai Jew ma Jentail maḡamaḡaui i vitumaḡana.

²Wate mai Jew ḡelaui eḡa vivitumaḡanai Jentail i kelari ma ai nota i barai da Paul ma Barnabas i geduaiei.

³Avena ma Paul ma Barnabas kampa i mae guratana ma ana tepatorai Bada ana aguei i jimajima. Ma kaua babaii ma vivirewapanai maḡamaḡaui i kauei. Wei i vimataira da ai jima lamna riwa kaua.

⁴Taon i kai ḡelaui mai Jew aubaii i mairi ma ḡelaui Aposol aubaii i mairi.

⁵Ma mai Jew ma Jentail ḡelaui i vioga da Paul ma Barnabas ḡaimei ita viraurauei.

⁶Wate taui riwana i vaia ma dobuna i ruba-tawanei ma i nae au taon ḡaeḡaei Listara ma Derbi au Laikonia provins ma taon au ririvai.

⁷Ma weka Riwana Aiaina i jimana-naiei.

⁸Au Listara oroto aena ḡokokokarana, alona manawanei gwaḡagwaḡana i vinatunei ma eḡa ita babara dadana.

⁹Kampa i kiala ma Paul i bababani i rarautaniḡanei. Paul matana i tawanei ma i ʼnanai da tauna i vitumaḡana da ita lawana

¹⁰ma i garara awarina, “Aemei ma mairi!” Ma orotona aenei i mairi ma babara i vikarei.

¹¹Maranai patara i ʼnanai Paul aiwai i kauei taui ava ai ponei i babani vivira, “god ruaḡa i ḡairai awarita me rava.”

¹²Taui i riwa da Barnabas lamna mai Greek ai god Zeus ma Paul i vitauvibabani aubaina i riwa da tauna Hermes.

¹³Zeus ana pulo gabuna, taon au giana, Zeus ana pirisi patara maiteni bull ma berana ulaulai i neiai taon au metaetana da Apasol ita puloi.

¹⁴Wate maranai Paul ma Barnabas wei riwana i nonori, taui ai gara i sikai ma i ruba-opu patara awarii ma i garara,

¹⁵“Aiwai aubaina wei kauana o kaukauei? Tauai rava ota me taumi nanare! Tauai Riwa Aiaina a neneiai da nai kauai kwakwavi ona voterei ma ona nae Bada lawalawaina ona viborumei. Tauna mara ma dobu ma boga ma aiwai anatapuna au orai i kauei.