Acts 13:7-36

⁷Ba kona wai, neyarina kana governor Sergius Paulus, sebare notanotana kwainana. Ba asi wara i porai sita botu kata ana waina God wonana siti sisiyei ita nonori.

⁸Saba kaikairapuna Bar-Jesus (kana waba Greek gamosi yai wai Elymas) i gesaira, i wosei kata governor kega iti geruwana.

⁹Saba Saul, yebo te yoreyorei Paul, Kanuma Kaobaisiyena i bonuvi wai, totorina kaikairapuna i kita garegarei,

¹⁰ba i wona, “Kom Satan natuna! Kom sawara gaigairesi kasi bibigoyona! Kom kwarukwarumim ba nota goyogoyosi i bonuwim, kata Bada ana keta totorina mamanina ke gudugudui ba ke wosewosei bage kwaruma!

¹¹Ba ke nonora, Bada ana maragatai saroba kuna yauni. Ba matam ina pota, ba mara yoginaikei kao yaseganina kega kuna kinani.” Mara kesana, Elymas sowasowa ba baidibara matana i bopotai kata kega kuni kinana, wai ibo gwamgwam, pipiya nimana sita yauni siti naovei.

¹²Maranai governor nikona i tupuwa i kinani wai i geruwana, ba Bada kairavina si bibeyebeyena wai yebo i wareyena saki.

¹³Paul turaturana yabata kukakukai si geru, Paphos si sumarei ba si nae ku Perga meyagina Pamphylia kupurinai ba namai, John Mark i sumarisi i veramaga ku Jerusalem.

¹⁴Ba Perga meyaginai Paul ba Barnabas si wagawaga si riu ku Antioch, kona wai Pisidia kupurinai. Ba Sabath maranai si riu Jew biyisi asi ku dugu yovena ba si makira.

¹⁵Kata Moses ana kairuwana ba peroperoveta asi buka kamosi yai si baiyavi murinai, Jew biyisi asi dugu yovena babadisi wara si porai si kurisi si wona, “Warewaresikai, komi nota kesana gwabimi yai emamana kata pipiya kota kao bitoraisi wai, ko botu koni sisiya.”

¹⁶Ba Paul imsiri ba nimana i bokabari kata pipiya sita ma guguba ba sisiya i dagui. “Israel biyim, ba Gentile biyimi, ba komi God ko bopepetei wai koi tainabaenega kuriku.

¹⁷Kota Israel biyita ata God tuputuputa matapa naki i bineisi, ba i wosisi si tuwa ba si maragata saki, ba yebo ana maragatai Egypt patumai i urabaisi si kasibau.

¹⁸Ba bodu 40 kupura momnai si yewo ba si kaosairei, saba i potaisi.

¹⁹Ba Canaan kamonai dam asi 7 i kasibigoyonisi, ba asi kupura Israel biyisi i berisi asi buderi.

²⁰Nikona ereonowana bodu 450 kamonai i tupuwa. Kona murinai God bibuibuiya biyisi i berisi siti bada yepo peroveta Samuel ana ku mara.

²¹Ba taupauma kairavina si baba wai God, Kish natuna Saul i berisi, sebarena wai kona Benjaman ana rakaraka kesana, ba bodu 40 rubana i bada.

²²Ba Saul i botaveyei murinai, wasana wai David i terei ba nikasike God i sisiya, ‘David, Jesse natuna a panani kata kona sebarena wai nuwanuwaku ba awaika au waina wai ereonowana ina wosei.’

²³Niko sebare David nosinosina kesana kamonai, God Israel biyisi asi Baibaiyawasina Iesu, i kaobiyoyobanisi wai i botu.

²⁴Muri yai Iesu ita botu wai, John Israel biyisi ereonowasi kurisi i rumamara kata asi piragagoyo ai sita tombaubaunisi ba siti nuwabirabira sita veramaga God kurina ba kata sita babataito.

²⁵Ba John ana saibira i bikakabi maranai i wona, ‘Komi ko nosinosi yauku Baibaiyawasina Kaobaisiyena kona? Kega, yauku wai kega kona, saba kona muri yai e botubotu wai, kana kae sumasuma yauku kega rubarubana ba ana tombaubauna.’

²⁶Warewaresiku, Abraham natunatuna ba komi Gentile biyimi God ko kumakumarei wai, niko baiyawasa warana i porai wai kota bi yawasita kairavina.

²⁷Ba Jerusalem biyisi ba asi babada koi Iesu kega si kuiri, kata kona wai Baibaiyawasina Kaobaisiyena, God ana binebinena ba si kasibunui wai, kata peroperoveta gamosi Sabath patepatena, te baibaiyavi wai bisuwona e tuputupuwa.

²⁸Bagunai wata kega ana goyona kesana saba Pilate si babai kata ita rabobo.

²⁹Awaika ereonowana kairavina si kirumi wai si wosei murinai, korosi yai si tere kirei ba karawaga nadegubana kamonai si dauwei.

³⁰Saba God rabobo ai i bobimsiriyei.

³¹Ba kao pesarisi iyabosi, Iesu yabata Galilee yai ba si yewo ku Jerusalem wai; kurisi i rerematara kata karaku kosi awaika si kinani wai, Israel biyisi kurisi te bi mamatarei.

³²Ba yakai karaku niko Wara Gairena ka botuwei kurimi. God ana Kaobiyoyobana tamatamata kurisi i wosei

³³wai, karauku God i mamatarei, kota kosi natunatusi kurita, sirinai Iesu rabobo ai i bomsiri meyei. Nikona wai Salamo bairuwaina kamonai i kirumi: ‘Kom kona natuku, karaku yauku wai tamam.’

³⁴Kairavina God i kaobiyoyobana kata rabobo ai ita bobimsiri, ba kega karawagai ita boterei ita paga. ‘Baibaigairenina kaobaisiyena David a kaobaiyoyobani wai ana berimi.’

³⁵Memena yebo kesana e wonewonita kata: ‘Am baibaigairenina kega tupuwina karawagai ina paga.’

³⁶Maranai David, God ana waina i wosei ana kimta asi marai wai, i rabobo ba tamatamana yabata si doguisi ba tupuwina dogu kamonai i paga.