Acts 13:35-52

³⁵“Kele ayeye arrpenhenge, David-ele ileme Ngkartele-arle yerneke-akerte alakenhe, ‘Ayenge ilwerlenge unte tyerrtye atyinhe arntirte-irretyeke impetyale, ayenge-arle ngkwenge arnterre anthurre ahentye-anemenge ngkwenge akangkwe-irremele.’

³⁶“Rarle anetyartenge, David-ele mpwareke Ngkartele-arle renhe ileke. David-elarle warrke Ngkarte-kenhe uyerrelhe-ileke iperre re ilweke anteme. Tyerrtye areyele renhe iperteke anteme arteke, yanhele intemele re arntirte-irremele ahelhe anteme irreke.

³⁷Nhenge David-ele arrule intelhe-ileke Jesus-akerte. Jesus ilweke anteye, kele Ngkartele renhe itetharle-ilirtnerlenge. Tyerrtye ikwerenhe akenhe arntirte-irretyakenhe-arle anerlenge, re awethe ilwetyeke arrangkwe-arle.

³⁸Atyewe areyaye! Ayeye nhenhe mwantyele awerrirraye! Anwerne arrekantherre ileme arrantherre itelaretyenhenge, Ngkartele anwernenhe ilpernetyakenhe aneme akurne mpwarerlenge Jesus-elarle anwerneke mpwarekenge. Arrantherre-arle angkentye Moses-kenhe apentetyartenge, Ngkarte ipeltye-irretyakenhe anetyarte arrenhantherrenhe atyewe ikwerenhe aketyakenhele. Kele nhenhe arrantherre Jesus-eke akangkwe-irremenge anteme re alakenhe mpwareme. Kele Jesus-eke akangkwe-irraye. Kele Ngkartele arrenhantherrenhe ilpernetyakenhe aneme, akurne areye urrparemele arrantherre mpwarerlenge, anyente anteme re arrekantherrenge irreme, ipeltye-irremele.

⁴⁰Akangkwe-irremele, ilernpenye anthurre anaye, nhenge iwenhe apeke renhe angkentye Ngkarte-kenhe awemele ilerle-apentye akngerre areyele ileke arrekantherre irreme-ketye-arle. Itne alakenhe intelhe-ileke,

⁴¹‘Awerrirraye, arrantherre ularele angkeme nthakenhe-arle Ngkarte angkemeke, arrantherre arratye apatetyenhe aremele nthakenhe-arle Ngkartele mpwaremeke, arrantherre arratye ilwetyenhenge. Arrantherre apatemele akangkwe-irretyakenhe anemele. Tyerrtyele arrekantherre arratye ilerlenge-arlke, arrantherre akangkwe-irretyakenhe anetyenhe.’ “Kele mwantyele awemele Jesus-eke akangkwe-irretyeke, arrantherre ilweme-ketyenge!” Alakenhe-arle Paul itneke angkeke.

⁴²Kele Paul uthene Barnabas uthene tyatye Jew areye-kenhenge arratetyeke anemele, tyerrtye arrpenhe areyele renhe-atherrenhe apayuthneke awethe urreke apetyalpetyeke arlte Apurrke arrpenhele ayeye renhe anteye iletyeke.

⁴³Kele-arle tyatye-ke irrpeke iperrele tyerrtye areye arrateke arrpenhe areyele renhe-atherrenhe apenteke, Jew areyele Jew anetyakenhe areyele-arlke. Jew anetyakenhe nhenhe areyele Ngkarte tnakeke, Jew areyele-arteke. Paul uthene Barnabas uthenele ayeye ilerle-anerreke arrulenge arrpenheke-atwetye alakenhe ilemele, “Ngkarte akwete apenterlte-anaye, arrantherre-arle itelaremenge Ngkartele-arle anwernenhe mwantyele arntarnte-areme.”

⁴⁴Saturday arrpenhele anteme, arlte apurrkele, tyerrtye ingkirreke apurte-irreke Barnabas uthene Paul uthene awetyeke Jesus-akerte angkerlenge.

⁴⁵Kenhe akngerrepate Jew areye-kenhe areye akenhe arrkngerte anthurre-arle irrerlenge, itne-arle tyerrtye areye apetyerlenge areke Barnabas uthene Paul uthene awetyeke. Akngerrepate areyele renhe-atherrenhe ilteke aheke angkerremele.

⁴⁶Kele ratherre akenhe akwenpe anthurre-arle angkerle-anerrerlenge, “Ngkartele ilernenhe yerneke ayeye Jesus-akerte ikwerenhe angketyeke arrekantherre Jew areyeke-amparre. Kenhe arrantherre kwenhe ayeye Ngkarte-kenheke akangkwe-irretyakenhe. Kele arrantherre imerneme arrantherre-arle Ngkartenge akwete anetyeke-kwenye-arle. Kele arrantherre ikwere akangkwe-irretye-kwenyenge, ilerne Jew anetyakenhe areye-werne alheme ayeye nhenhe anteye itneke iletyeke.

⁴⁷Ilerne alakenhe mpwarerle-anerreme Ngkartele-arle ilernenhe ilekenge alakenhe mpwaretyeke. Re alakenhe angkeke, ‘The renhe-atherrenhe alkngenthe-arteke Jew anetyakenhe areye-werne yerneme, mpwele itelareme nthakenhe-arle alkngenthe pwarrtyeme arne areye alkngenthe-ilemele arltele-arteke, alakenhe-arle. Mpwele ayeye mwerre itneke iletyenhe, itne akenhe awerlenge-arle, akangkwe-irremele, Ngkartele itnenhene itetheke mpwaretyenhe, tyerrtye apmere arrpe-anenhe-arenye areye.’”

⁴⁸Jew anetyakenhe areyele nhenhe awemele Paul angkerlenge itne arnterre anthurre akangkeke Ngkarteke renhe utyernemele. Itne alakenhe angkerreke “Ngkarte-aye! Ayeye ngkwinhe Jesus-akerte mwerre anthurre. Anwernele ngenhe arnterre anthurre utyerneme tnakewarremele.” Jew anetyakenhe ingkirreke Ngkartele-arle akngakeke ikwerenge akwete-ante anetyeke ayeye Jesus-akerteke akangkwe-irreke.

⁴⁹Nhenhe ikwerele-ureke, akangkwe-arle-irreke areye untherlte-apeke arrpenhe areyeke ayeye Jesus-akerte ilerlte-apemele apmere arrpe-anenhele. Tyerrtye awethe atningke anteme Jesus-eke akangkwe-irreke.

⁵⁰Kele Jew akngerrepate arrpenhe areye akwete ahele angkerreke Paul uthene Barnabas utheneke. Itne apurte-irreke akngerrepate apmere yanhe-arenye areyenge, arelhe akngerrepate areyenge-arlke Jew apententye akngerre areye ikwere-atherre arrkngerte irretyeke mpwareke. Akngerrepate itne ikwere-atherre ahele irrerreke imerte renhe-atherrenhe ayepwemele apmere arrpenhe-werne.

⁵¹Kele ratherre apmere renhe impemele alheke, ratherre ingke-kenhe ilywerle-anerreke ulpmernte-arlke lernemele angkerle-anerreke, “Ilerne alakenhe mpwareme arrantherre-arle ayeye Jesus-akerte nhenheke apale angkekenge. Arrantherre iltemele ilernenhe yerneke Ngkarteke akutne areye-arteke.” Kele ratherre ingke-kenhe ikwere-atherrenheke irrperle-alherreke imerte alhemele apmere arrpenhe-werne Iconium arritnye-werne.

⁵²Kele apmere yanhele, apmere nhenge ratherre-arle imperle-alherreke, Jesus-kenhe areye akangkentye anthurre aneke. Utnenge Akngerre itnekenge akwetethe aneke.