ACTS 13:35-42

³⁵Te Laupepa Tapu raa e taratara hoki peelaa: ‘Too Tama e Tapu nei ma ki see lavaa te tiiake koe ki moe no purau iloto te kava.’

³⁶I David ni haia a ia naa heuna TeAtua raa i tana saaita koi ora, aa i tana saaita ni mate raa a ia ni tanumia ma ana tammana, teenaa tana haitino ni moe no purau iloto te kava.

³⁷Tevana iaa te mee nei ni see sura ki te tama TeAtua ni hakamasike i te mate.

³⁸“Aku taaina nei. Maaua nei e fiffai maa kootou ki illoa maa naa haisara kootou naa e lavaa te uiia TeAtua i te vana Jesus ni mee naa.

³⁹Naa Loo Moses raa see lavaa te uii naa sara taatou. Jesus iaa e lavaa te haia a Ia naa ora naa tama e hakataakoto tonu iaa Ia raa ki mataffua.

⁴⁰Matamata hakaraaoi ki see ssura ki kootou naa mee ni tarataraina naa pure TeAtua raa:

⁴¹‘Hakannoo mai, kootou naa tama e taratara taussua iaa nau! Aa llee naa mouri kootou aa kootou ku mmate! I aa nau ma ki mee taku vana ki kootou i te saaita kootou koi ora. Niaaina maa se tama e taratara atu ma ki illoa kootou raa, kootou ma ki hai maa nau see lavaa te mee peenaa!’”

⁴²Te saaita Paul laaua ma Barnabas ni massike i te hare lotu naa ki oo raa, naa tama i te kina naa ni taratara ake ki ahe ake laaua i te ssoa te Sabat raa no kauake hoki ni taratara i naa mee nei ki hakannoo laatou.