Acts 13:32-49

³²“Ke pau iifa faunina Iesu fouga oi maamiai aifafoua. Egaꞌina auga ufainagai Deo iꞌa ufuꞌa apaꞌa maaꞌiai Iesu maeai agepamaunimue auga epakoꞌania eifania.

³³Deo pau pakoꞌa iifaga egaꞌina iꞌa ufuꞌa apaꞌa egaꞌina okoꞌiai amai auꞌa, fauꞌaisai koꞌa mo epamia, Iesu maeai epamaunimue. Egaꞌina emia auga Isa ega iifa pukagai Sam 2 alogai iina eifa oma koa iꞌopoga mo emia: “‘Oi Lau Gau, pau Lau oi Amamu lamia,’ eoma

³⁴Deo Iesu epamaunimue, ke imaauga aepuaꞌafuga aefoka auga fouga Deo ega iifa pukagai iina eifa oma: “‘Ufainagai Davide maagai lapakoꞌania laifania, isa okogai akemai auꞌi eꞌu pipeni fauniꞌi alapeniꞌi laoma. Ega koa iꞌopoga pau Lau Gau, oi faagamuai alakapa,’ eoma.

³⁵Ega puo Sam pukagai afu agaꞌogai isafa Iesu maeai emaunimue auga fouga iina eifa oma: “‘Oi ainamu eafia maamuai Alo Elolofa Auga imaauga afolopuaꞌafuga afaefoka,’ eoma.

³⁶“Gome Deo ega logoai anina eani, Davide eagu miagai papiau keagu auꞌi eꞌi pinauga fekapa eoma auga ekapaisa efua afegai emae. Ke isa imaauga keafiia ufuga apa kefufuniꞌi auꞌi eeꞌiai kefufunia, ke isa imaauga efoka.

³⁷Kai Deo Iesu maeai epamaunimue, imaauga aefoka.

³⁸“Ega kainai aau akiu, oi kapaꞌina fologo laoma auga alaifania. Isa faagagai Deo oi emi laomai apalaꞌi ageꞌagegeainiꞌi auga fouga maamiai aifafoua.

³⁹Ke oi Moses ega iifa maꞌoai kaiꞌiai fopea alo opai aumi fomia auga aekainia. Kai kaisau isa kepakoꞌania auꞌi, isa faagagai alo opai auꞌi kemia.

⁴⁰Ega puo foꞌima feloimi ega koa ufainagai profeta iina keifa oma auga oi faagamiai faemia:

⁴¹“‘Amoisa! Oi Lau kapaꞌina laifania auga eegai oifa apala, opamafua aumi! Oi emi aguagu kina alogai eemiai kapa agaꞌo apala ipauma alakapa. Ke faagamiai apala ipauma agemia aisama, agoisa agokauai alogaina agomae. Gome oi emi agu kinagai kapa agaꞌo alakapa, ke aufalao agaꞌo egaꞌina iifaga oi maamiai ageifafoua mo ganinagai, afolopapakoꞌania,’” eoma.

⁴²Paulo einogo efua Banabas auniꞌi Iudea papiauꞌi eꞌi laꞌafou afuga kepuaꞌafuga kelao. Egaꞌina alogai papiau isa kepainiꞌi, Deo keau afagaina kina agaꞌogai fekemai pugu, egaꞌina iifaꞌi fekeinogoainiꞌi pugu keoma.

⁴³Egaꞌina laꞌafouga ekani aisama, Iudea papiauꞌi maꞌo ke Iudea papiau laaꞌi kai Iudea eꞌi kagakaga muninai kepea auꞌi fou, Paulo Banabas auniꞌi muniꞌiai kepea. Ke Paulo Banabas auniꞌi isa fou keniniꞌani, magogo kapula kepeniiꞌi kina maꞌoai Deo ega gafegafe akaikiꞌa isapugai fekeagu felo keoma.

⁴⁴“Ke iifi agaꞌo elao afegai, Deo keau afagaina kinagai aisama, Antiok taoninai papiau fofouga koa iꞌopoga kemai laꞌafou afugai kekaigugu Deo ega iifa aꞌo kegalogo keoma.

⁴⁵Kai Iudea papiauꞌi laꞌafou akaikiꞌa keisa aisama, aloꞌi pikupa epogu. Ke Paulo kapaꞌina eifania auꞌi eeꞌiai keifa apala.

⁴⁶Ega aisama Paulo Banabas auniꞌi aloꞌi eaipa ke keifa keinaka, “Lai Deo ega iifa, oi Iudea papiaumi maamiai faifa kakaua auga ekainia puo aifania. Kai oi iꞌina oumakalaina, ke agu pagai maunina foafia auga ifomi oisami aekainimi ooma. Ega kainai amoisa, lai Iudea papiau laaꞌi auꞌi aaipeniꞌi.

⁴⁷Gome Lopia lai epaini kapulanimai iina eifa oma: “‘Lau oi Iudea papiauꞌi laaꞌi auꞌi fauꞌiai eaea lapamiaimi. Ega koa oi agofaꞌa fofouga papiauꞌi eeꞌi folao kaniaꞌi foagamauga,’” eoma.

⁴⁸Ke Iudea papiauꞌi laaꞌi auꞌi iꞌina iifaga aꞌo kelogonia aisama aloꞌi egama alogaina. Ke Lopia ega iifa kapa akaikiꞌa kepamia. Ke Deo ega logoai ekinaniꞌi agu pagai maunina afuga epeniiꞌi auꞌi maꞌoai Iesu kepakoꞌania.

⁴⁹Ke Lopia Iesu fouga egaꞌina ago fofouga epeaisa.