Acts 13:30-51

³⁰Saba God rabobo ai i bobimsiriyei.

³¹Ba kao pesarisi iyabosi, Iesu yabata Galilee yai ba si yewo ku Jerusalem wai; kurisi i rerematara kata karaku kosi awaika si kinani wai, Israel biyisi kurisi te bi mamatarei.

³²Ba yakai karaku niko Wara Gairena ka botuwei kurimi. God ana Kaobiyoyobana tamatamata kurisi i wosei

³³wai, karauku God i mamatarei, kota kosi natunatusi kurita, sirinai Iesu rabobo ai i bomsiri meyei. Nikona wai Salamo bairuwaina kamonai i kirumi: ‘Kom kona natuku, karaku yauku wai tamam.’

³⁴Kairavina God i kaobiyoyobana kata rabobo ai ita bobimsiri, ba kega karawagai ita boterei ita paga. ‘Baibaigairenina kaobaisiyena David a kaobaiyoyobani wai ana berimi.’

³⁵Memena yebo kesana e wonewonita kata: ‘Am baibaigairenina kega tupuwina karawagai ina paga.’

³⁶Maranai David, God ana waina i wosei ana kimta asi marai wai, i rabobo ba tamatamana yabata si doguisi ba tupuwina dogu kamonai i paga.

³⁷Saba kotoi God rabobo kamonai i bobimsiri meyei wai tupuvina kega i paga.

³⁸Warewaresiku, kona kairavina au waina niko wara kona kuira kabitamni kata, Iesu karinai wai piragagoyo notataveyana e mamana, wai karaku nina a raumamarei kurimi.

³⁹Kotoi wata ini geruwei wai ana piragagoyo ai e tombubauni, ba Moses ana kairuwana ereonowana kuna bosisiri wai, kega rubana piragagoyo ai ina tombubaunimi.

⁴⁰Ko pota kabitamni! Kata kega Peroperoveta awaika si sisiyei wai ini garubona kurimi, kairavina kosi si wona,

⁴¹‘Komi bigigima bitami, ko nuwasuyei ba kona rabobo, kairavina awaika ami marai ana wosei wai kega koni geruwei, bagunai wata kotoi ina wona berimi.’”

⁴²Ba maranai Paul ba Barnabas Jew biyisi asi dugu yovena si bisumarei wai pipiya si babaisi kata murina Sabath i botubotu wai yebo sita veramaga nikosi wona mutusi yebo siti sisiyena mena.

⁴³Ba pipiya ereonowasi Jew biyisi asi dugu yovena si bisumarei wai Jew biyisi pesarisi ba Gentile biyisi, wausi si geruwana wai Paul ba Barnabas si sununurisi kata asi ruwamo si kao bitamarisi kata God ana baibaitai sita mana.

⁴⁴Ba Sabath i botu wai meyaga kaikapona pipiyisi tupana si botu Bada wonana sita nonori.

⁴⁵Saba Jew biyisi mutusi koroto si kinani wai si nuwarauwa, ba Paul awaika i bisisiyei wai si kaobigoyoni ba si kawapatei.

⁴⁶Saba Paul ba Barnabas ere tepatorasi si kaobeyisi si wona, “Kainaona wai God wonana komi Jew biyimi kurimi kana rumamarei. Saba kana kinana kata komi ko totoyana ba ko nosinosi kata komi yawasa mama damanina kurimi kega ebi damanina, kona kairavina Gentile biyisi kurisi kana nae.

⁴⁷Ba Bada i kaotunetuneyikai i wona, ‘A wosimi Gentile biyisi kurisi kona ruyasegana, ba yawasa damana kona yauni koni sisiyei dobu ku pusirina.’”

⁴⁸Maranai Gentile biyisi nikona si nonori wai si nuwagaire saki, ba Bada si bokakabari niko wara kairavina, ba iyabosi yawasa mama damanina kairavina matapa i bineisi wai si geruwana.

⁴⁹Ba Bada wonana kupura ereonowana i bonuvi.

⁵⁰Damanina ba Gentile bibaine Jew biyisi asi God te bo pepetei wai ba meyaga kana babada yabata, pipiya si tamarisi wai Paul ba Barnabas meyaginai si kwabinisi.

⁵¹Ba kosi kaesi momokarina si kasitataba si beyisi kata kega si nuwagaire ba si nae ku Iconium meyagina.