Acts 13:28-51

²⁸Yugu aram rogon ndar pir’eged ban’en ni ir e nge mang tapgin ni nganog ni ngan li’ ngem’, machane miyad wenig ngak Pilate ni ngan li’ ngem’.

²⁹Ma nap’an nra mu’gad i rin’ urngin e tin ni kem’ay i weliy rok e babyor nib thothup ni murung’agen, miyad luweg nga but’ u kuruth ngar ted ngalan ba low ko yam’.

³⁰Machane me faseg Got Jesus ko yam’,

³¹ma bo’or e rran ni i m’ug ngak e pi’in nra uned ngak ko milekag u Galile nga Jerusalem. Yad e chiney e yad be weliy murung’agen Jesus ngak e girdi’ nu Israel.

³²Ma gamad e kugbad ngaray ni nggu feked i yib ngomed e re Bugithin ney Ni Bfel’ ni murung’agen: tin ni yog Got ngak e pi chitamangidad ni bay rin’ e ke rin’ e chiney ni fan ngodad e pi’in owcherad, ni fan e ke faseg Jesus ko yam’. Ni bod rogon ni kan yoloy ko bin l’agruw e Psalm ni be ga’ar: ‘I gur Fakag; daba’ e kug mang Chitamam.’

³⁴Ma ba’aray e n’en ni yog Got ni murung’agen ni bayi faseg ko yam’, ma dabi pag nge mel u lane low: ‘Bay gu rin’ ni fan ngomed fare n’en nrib fel’ ma ba thothup ni gu micheg ngak David ni bay gu rin’.’

³⁵Ni bod rogon ni kari yog u bang u lan e babyor nib thothup nike ga’ar, ‘Dabiyag ni ngam pag e tapigpig rom nib yul’yul’ nge mel u lane low.’

³⁶Ya David e i ngongliy e tin ni leamnag Got ko birok’ e tayim, nge mu’ me yim’, mi ni k’eyag nga to’oben pi chitamngin, me mel u lane low.

³⁷Machane en ni Got e faseg ko yam’ e de mel.

³⁸Pi walageg, gimed urngin ni ngar mu nanged nu daken Jesus e ke yag ni ngan machibnag riy ngomed murung’agen e denen nrayag ni nge n’ag Got fan; ma ngam nanged ni urngin e girdi’ nra mich Jesus u wun’rad e kan n’ag fan urngin e denen rorad ndabiyag ni nge n’ag fare Motochiyel rok Moses fan.

⁴⁰Ere mu ayuwgad, ya fare n’en nike yog fapi profet e nge dabi buch romed ni lungurad:

⁴¹‘Mu sapgad e pi tamoning! Mu ngatgad mi gimed yim’! Ya maruwel ni gu be ngongliy ko tiromed e rran e ban’en ni gathi bayi mich u wun’med, ni mus ni fa’anra weliy be’ fan ngomed!’”

⁴²Nap’an ni be n’en Paul nge Barnabas ni ngranow ngar chuwgow u lan tafen fare ulung, me yog fapi girdi’ ngorow ni ngku ra bow ko bin ni bay yib e Sabbath ngku ra weliyew ngorad murung’agen e pin’em.

⁴³Ma fa’ani wear e girdi’ ko fare mu’ulung, ma bo’or piyu Israel nge pi’in gathi yad piyu Israel ni kar piggad kar uned ko ba’ rok piyu Israel e taliw nra uned ngak Paul nge Barnabas. Me welthin fa gal apostel ngorad ni yow be pi’ e athamgil nga lanin’rad ni ngu’ur pired ni yad be toer ko runguy rok Got ngorad.

⁴⁴Me taw ko fare rran ni Sabbath ma gonap’an e urngin e girdi’ u lan fare binaw nrabad ngar motoyilgad ko thin rok Somol.

⁴⁵Ma fa’ani guy piyu Israel fapi girdi’ ni aram urngirad, me yib e awan’ ngorad; miyad non nib togopluw ko thin ni be yog Paul miyad yog e thin nib kireb ngak.

⁴⁶Machane fin aram e welthin Paul nge Barnabas ndar rusgow ni be lungurow, “Ri dabisiy ni gimed e som’on ni ngan weliy e thin rok Got ngomed. Machane fa’anra kam n’iged, ma damur fineyed ni bay rogomed ni nge yag e yafos ndariy n’umngin nap’an ngomed, ma bay gu pagew gimed nggu warow ngak e pi’in gathi yad piyu Israel.

⁴⁷Ya ba’aray e thin ni pi’ Somol ngodad ni fa’ani ga’ar: ‘Kug tiyem ni ngam mang tamilang ngak e pi’in gathi yad piyu Israel, me gur e ngam mang kanawo’ ni ngan thap riy ngak Got ni fan ngak urngin e girdi’ nu fayleng.’”

⁴⁸Ma fa’ani rung’ag e pi’in gathi yad piyu Israel e re bugithin ney miyad felfelan’ ngrogned ni bfel’ e re thin rok Somol nem; ma pi’in ke mel’egrad Got ni nge yag e yafos ndariy n’umngin nap’an ngorad e mich Jesus u wun’rad.

⁴⁹Me wear e thin rok Somol nga urngin yang u rom.

⁵⁰Machane me pingeg piyu Israel laniyan’ e pumo’on ni be tay murung’agen e re binaw nem nge pi’in ni ppin ni tolang ni gathi yad piyu Israel ma yad ma meybil ngak Got, ngar tababgad i gafgownag Paul nge Barnabas, miyad therbegrow ko nug rorad.

⁵¹Me rurug fa gali apostel e fiyath u ayrow nib togopluw ngorad miyow yan u rom nga Ikonium.