Acts 12:6-24

⁶Ma nai waguvaraina, ma maratomna da Peter ita rauetarei, Peter sorodia ruaḡa au poui i matamatave. Urana seinei i raḡini sorodia ruaḡa au urai, ma sorodia ḡelaui au metaeta i vipaipai.

⁷Maratagogi Bada ana anela i eḡa ma pani numana i ravilalai. Ma Peter i vogugui da matana i kala ma i riwei, “Laḡilaḡina ma vomairi!” Ma sein au urana i dabarara.

⁸Ma Peter i riwei, “Ma vigara ma ae uma ma oteni.” Ma nanare i kauei. Ma i egari, “Am kwama potopotona ma oteni ma ma votaḡotaḡoiu.”

⁹Peter anela i votaḡotaḡoi da pani numana i opu-tawanei, wate eḡa ita aramanei anela aiwai i kaukauei, tauna i notai i rarauboni.

¹⁰Taui, sorodia boruna ruaḡa au doa i netawanei, da i opu au metaeta iramei, wei e opuopu au taon. Metaeta ainelana i wanatawanei aubaii ma i opu. Taui etanai tagogi i ḡairani ma maratagogi anela tauna i voterei.

¹¹Peter ana nota i nememei ma i riwa, “Wei anina riwa kaua! Bada ana anela i paritawaneiai da Herod au urana i vaitawaneu, da mai Jew aiwai i notanotai da ita tupua lamna eḡa ita tupua.”

¹²Maranai ana nota i nememei tauna i nae Mary ana au numa. (Mary lamna John alona. John wavana ḡelauna Mark). Kampa rava maḡamaḡaui i vitagogiei ma i raraupari.

¹³Peter au metaeta i raupewapewa ma taunola wavana Rouda i nei da metaeta ita votawanei.

¹⁴Ma Peter ponana i nonori ma i aramanei da tauna, ma i vinuaiai guratana da eḡa metaeta ita votawanei ma i ruba-rui da i vinolanola i pa, “Peter au metaeta e maimairi!”

¹⁵Wate taui eḡa ita vitumaḡanei ma i riwei, “Tam ma bubua!” Wate tauna i riwa bagibagi. Ma taui i riwa, “Nai Peter ana anela.”

¹⁶Wate Peter i rarau-pewapewa ma maranai taui metaeta i votawanei ma i ʼnanai da tauna, taui orai i auepai.

¹⁷Peter urana i voepai da rava i genuana ma i riwei menanare Bada pani numanei i tere-opunei. Ma i riwei, “James ma ekalesia ḡelaui wei ona pariverei.” Ma Peter i nae au dobuḡela.

¹⁸Maranai mara i tom kampa au pani numana nuabola ma vinuanaina ḡaeḡaena i peu sorodia awarii da aiwai i tupua Peter awarina

¹⁹Herod, ana sorodia i egari da Peter i baiei wate eḡa ita nelaḡai. Lamna aubaina sorodia 16 i etarei ma i viraḡeni. Muriai Herod Judea i netawanei ma i nae au Caesarea da ita mae mara aburuna.

²⁰Marina Herod amlona i ḡaiḡai kaua Taia ma Sidon ravai awarii, lamna aubaina taui ana borui i nei da Herod maiteni wei i babaniei. Taui Herod ana taunola ḡaeḡaena Blastus, i taravaini da ita voagui. Taui rom i vibaḡei Herod maiteni. Aubaina ai lam Herod ana dobuei i nenei.

²¹Ma marana i ḡetai da Herod maiteni ita viboru ma tauna ana vigulau garana i vigarei ma ana au anikiala i kiala ma awarii i babani.

²²Ma patara ana babani i nonori ma i logoi i pa, “Wei lamna god e bababani ma eḡa rava!”

²³Maratagogi Bada ana anela Herod i vipeuni au doa ma motamota orana i ani da iʼraḡe, aubaina tauna rava ai voepaepa i vinuaiaiei ma eḡa rava ita riwei da Bada ita voepaepai.

²⁴Ma ekalesia Bada riwana i raraugugulei ma rava maḡamaḡaui i nenei Bada awarina ma ekalesia i rarata.