Acts 12:2-23

²Re uterneke thultye ikwerenhe areyele James arntwirrkemele atwetyeke, John-kenhe kake. Itne anteme renhe arntwirrkemele irrerlknge atweke, akaperte akemele.

³Jew akngerrepate arrpenhe areyele awemele thultye areyele-arle James atweke-akerte itne arnterre akangkeke. Herod-ele awemele itne-arle akangkeke re ahentye aneke itnenhe awethe akangketyeke mpwaretyeke. Re anteme itnenhe ileke Peter-arlke arntwirrketyeke renhe-arlke irrerlknge atwetyeke. Kele thultye itne alhemele Peter arntwirrkeke. Yanhenge akenhe Jew areyele merne ulperre-ulperre-arle arlkwetyame, Passover arrawe-irrentye itelaremele.

⁴Kele thultye areyele-arle Peter arntwirrkekenge, Herod-ele ileke itne renhe jail-ke akwernetyeke, jail kwene-kwene anthurreke. Re ileke thultye 16-pele anthurre ikwere mwantye arelhetyeke arltele ingwartentyele-arlke. Thultye 4-pele-urrke ikwere mwantye arelheke, yanhe iperre thultye 4-pele arrpenhe anteme ikwere mwantye arelheke, alakenhe. Herod-arle alakenhe itirrekenge, “Passover arrawe-irrentye uyerrerlenge the renhe court-eke akwernetyenhe judge-le renhe ilpernetyenhenge Jew areyele arerlenge.”

⁵Thultye areyele Peter arntarnte-arerrirretyame jail kwenenge court-eke akarelhemele. Peter-arle jail kwenele anekenge Jesus-kenhe areye ikwere arnterre Ngkarteke angkeke tyerrtye areyele renhe atweme-ketye.

⁶Ingwe ikwerele Passover arrawe-irrentye-arle uyerrekenge Herod alakenhe itirreke, “Ingweleme ayenge akeme-irremele the artwe yanhe renhe court-eke ngkernetyenhe.” Kele ingwe ikwerele anteye Peter-arle ankwe intekenge jail kwenele thultye atherre mpwepele. Thultye ratherre akenhe iltye Peter-kenheke-arle ayernelheke ikwere itwele intemele. Thultye arrpenhe atherre akenhe arriwele-arle tnerle-anerreke.

⁷Impeltye-ngentyele alkere-arenye Ngkarte-kenhe anteme arrateke jail kweneke Peter itweke, alkngenthe akngerre pwarrtyeke. Alkere-arenyele Peter anpeke re interlenge imerte renhe akarrelhe-ilemele ikwere alakenhe angkemele, “Iparrpaye, akeme-irraye!” Chain areye itne-arrpe akwete arrewelheke amulte ikwerenhe-ngentyele.

⁸Alkere-arenye re anteme ikwere angkeke, “Mantere ngkwinheke irrpaye ingke-kenheke uthene!” Re anteme mantere uthene ingke-kenhe ikwerenheke uthene irrpeke! Awethe anteme ikwere angkeke, “Mantere arrpenhe ngkwinheke irrpaye imerte ayenge apentemele!”

⁹Peter anteme akeme-irreke, imerte mantere ikwerenheke irrpemele alkere-arenye apentemele, re imerte apatemele-arle, “Ayenge-ame arratye jail-nge arratenheme? The apeke-arle renhe altyerrenge-arle apenteme.”

¹⁰Ratherre anpere alherreke thultye atherre arriwele-arle tnerle-anerretyamenge ratherrele akenhe Peter uthene aretyakenhe-arle. Ratherre thultye arrpenhe areyenge anpere-alheke, itnenhene ingkerneke iwerle-alherremele akethe-werne-atheke, arriwe akngerre itwele. Kele arriwe re-arrpe akwete altywere-irreke, ratherre anteme jail-nge arratemele apetyeke. Iwerre arratyeke irremele alkere-arenye re uyerreke.

¹¹Alkere-arenye rarle alhekenge Peter alakenhe itirreke, “Ayekaye! Arratye apelaye alkere-arenye Ngkartele-arle yernekele-arle, ayenge arratelhe-ilerne. Arratye-arle ayenge Ngkartele arntarnte-areke Herod-ele ayenge irrerlknge atweme-ketye. Kele thultye areyele ayenge atwetyeke arrangkwe-arle Jew areyele aretyeke.”

¹²Alakenhe-arle re itirreke iperrele re apmere Mary-kenhe-werne alheke. Arelhe nhenhe meye John-eke aneke, arritnye ikwerenhe arrpenhe Mark aneke. Apmere nhenhe ikwerele Jesus-kenhe areye apurte-irreke Ngkarteke angketyeke, Peter-eke.

¹³Peter akethele tnetyame arriwe atwemele. Kenhe arelhe awenke urrkapentye Rhoda arritnyele awemele, arriwe-werne apetyemele apayuthneke, “Angwenhe-ame unte?”

¹⁴Peter ikwere angkirtnerlenge re ahentye alhengke-awemele akangkeke arnterre. Re imerte arriwe altywere-iletyakenhe-arle anemele. Akngerre akangkemele re unteke arrpenhe areyeke iletyeke, “Awaye! Peter kwenhe akethele tneme.”

¹⁵Itne angkirtnewarreke, “Arrangkwe, unte-arle arerte-arle irreme.” Re akenhe akwete-arle angkerlenge, “Arrangkwe, the kwenhe arratye ileme. Re kwenhe yanhe akethele tnerle-aneme.” Itne anteme angkeke, “Arrangkwe, alkere-arenye ikwerenhe apeke-arle apetyeke-arle yanhele tnerle-aneme.”

¹⁶Itne-arle angkerretyamenge Peter akwete akethele tnetyame arriwe atwemele. Kele arratye anteme itne arriwe altywere-ilemele renhe areke itne arratye apatewarreke, “Ayekaye! Nthakenhe-ame re jail kwene anthurrenge arraterne?”

¹⁷Kele re iltye akngelhemele itnenhene ileke nterte-irremele renhe awetyeke. Re anteme itneke ileke nthakenhe-arle Ngkartele alkere-arenye yerneke renhe jail-ngentyele arratelhe-iletyeke. Kele-arle re itneke ileke iperre re angkeke, “Alherlte-iwaye, James tyatye-arenye akngerrepate anwerne-kenheke iletyeke atyewe Jesus-kenhe areyeke-arlke nthakenhe-arle-irreke-akerte!” Kele yanhenge anteme Peter-ele itnenhene ingkerneke iwerle-alheke imerte apmere arrpenhe-werne anteme alhemele.

¹⁸Ingweleme anteme jail kwenele thultye areye akeme-irrereke imerte Peter-eke apale untherremele itne apatemele uyarne itirreke. Itne alakenhe akwete apayuthnerreke, “Nthakenhe-ame artwe nhenge nhenhenge uyerrerle-alheke?”

¹⁹Herold-elarle aweke iperre, re thultye ikwerenhe areye uterneke ikwere unthemele renhe arntwirrketyeke, itne akenhe ikwere uyarne-arle untheke. Awethe anteye re thultye jail-elarle aneke nhenge areyeke antangkeke imerte itnenhene apayuthnemele nthakenhe-arle irrekeke, itne akenhe apaterlenge-arle. Uyarne itnekenge angkentye inemele re thultye arrpenhe areye ileke itnenhe akngemele irrerlknge atwetyeke. Herod-ele anteme apmere yanhe Judea impemele alpeke apmere Caesarea-le anteme anetyeke.

²⁰Nhenhe ikwerele-ureke, akngerrepate Herod ahele anthurre irreke tyerrtye apmere Tyre uthene Sidon uthenele-arle anekeke. Re tyerrtye ikwerenhe areye ileke itneke merne yernetyale anetyeke. Tyerrtye apmere yanhe-arenye areyele apmere Herod-kenhenge merne inetyarte. Kele, Herod ahele akwete aneme-ketye, itne ikwere-werne alheke mwerrantye angketyeke. Urreke itne ikwere-werne alhetyenhenge, itne alheke artwe Blastus arritnye-werne, apmere Herod-kenhe arntarnte-arentye akngerre. Itne renhe apayuthneke Herod itnekenge anyenteke-irretyeke mwerre anetyenhenge. Itne anteme apurte alherlte-iweke Herod aretyeke ikwere angketyenhenge ipeltye-ilerremele.

²¹Arlte ikwerenge Herod-arle angkeke itnekenge apurte-irremele angketyeke, re mantere alkarle anthurreke irrpeke, mantere nhenge pwathe akngerre areye irrpentye akngerre, re chair mwerre akngerre ikwere arrernelhemele angkeke tyerrtye renhe-arle aretyeke apetyeke areyeke.

²²Tyerrtye awetyame-arle areye ikwere akangkeke rarle angkekenge, itne ikwere arlkemele angkeke renhe tnakemele, “Ayekaye, unte-arle artwe-arteke anetyakenhe-arle unte-arle alkere-arenye-arteke-arle angkeme, Ngkarte-arteke.”

²³Iparrpe anthurre alkere-arenye Ngkarte-kenhele renhe rlkerte-ileke, atnerte kwene renhe arlkweke mpwere areyele-arteke lyepe-lyepe ikwerenhe-arlke renhe irrerlknge atwetyeke-ante. Re anteme ilweke. Herod tnakelheke arntwelhemele, rarle tyerrtye areye ayaketyakenhe-arle irreke renhe tnakeme-ketye, itne-arle Ngkarte-ante ware utyernemele tnaketyeke, renhe kwenye!