12Peter Mary-kenh apmer-warl alhek. Mary John-kenh amikw anenh. John itna ingweran ikwerenh Mark. Mary-kenh warl-itwek Jesus-arl apenteyel ingwer-rnem arrwekel akarrirrek Akngey-warl angkayntetyek.
13Peter ra arriw renh rltar-atwek. Kwey warrkenh anyent itnan ikwerenh Rhoda ra arriw-warl alhek aretyek.
14Peter ra angkek. Warrkenhel renh alhengk-awek inkwerelhemel. Peter ikwer arriw-anem altyweriley-angenh. Kel anamerl-antey ingwer-rnem ilek, “Peter yanh arriw-itwek rtneyel!”
15Rernem renh ilek, “Kwey, ngan arwengkwarl!” Ra angkek arrpemarl, “Peter yanhey arriw-itwek rtneyel!” Rernem apal angkek, “Kel, itnweng arrewaly ikwerenharl yanhan.”
16Peter-el arriw renh rltar-atwek arrpemarl. Arriw renh altywerilemel Peter-anem rernem arek rtnerl-anenty. Rernem ywarn iterrek.
17Peter-el renh-rnem akaterilek, ranem ikwer-rnem ilelhek angel-elarl renh tyayl-they tyarlewek. Ikwer-penh ra renh-rnem ilek, “James-rnem-then ilenherr-arey, ayeng tyayl-they tyerrelhek.” Renh-rnem iwerl-alhemel, Peter ra apmer ingwer-warl-anem alhek.
18Ingwepenh-anem tyayl-areny ahelengkw-rnem ywarn iterrek. Rernem Peter ikwer ywarek.