Acts 12:1-8

¹King Herod-el-anem ahelengkw-rnem thwenek, rernem tyaty-areny atwetyek. Ingwer-rnem anterrkwek.

²Ranem ahelengkw ikwerenh-rnem thwenek, James John-kenh ayteyikw akapwert arternetyek nayp arlpenty arreylpel.

³Herod-el awek Jew-rnemarl ikwer inkwerelhek. Alakenh-anyem ra ahelengkw-rnem thwenek Peter renh anterrkwetyek. Arlta ikwerel Jew-rnem akarrirrek amern ilperr-ilperr thwet-weny arlkwetyek, Akngeyek inkwerelhetyek.

⁴Rernem Peter renh anterrkwek tyayl-warl-anem akwernek. Herod-el ahelengkw akngerr thwenek, rernem renh arraty innga arntarnt-aretyek. Ra iterrek Peter renh court-emiletyek angka akngerr ayernetyek amern tyenkerr arlkwenty-penh.

⁵Alakenh-anyem Peter tyayl-itwek anenh. Tyaty-arenyel-rnem Akngey ayernenh Peter ikwer, Akngeyel renh arntarnt-aretyek tyayl-itwel.

⁶Ingwa ingwerel-anem Herod ra iterrek, “Ingwepenh atha Peter renh ayerneyenh, court-emiletyek.” Peter ahelengkw-atherr-they ampepel ankwayntenh, tyayl kwen-itwek. Ahelengkwel renh tyeyn atherrel arertnek. Ahelengkw ingwer atherr arriwelarl rtnenh.

⁷Ingkart-kenh angel kwen-itwek aremirrek. Lyenentyel-anem renh-atherr arrtyernek tyayl kwen-itwek. Peter rlta arnemel, angkek-anem, “Anamerl akemirra!” Tyeyn ratherr-anem Peter iltyethey lhelelhek.

⁸Angel ranem renh ilek, “Arnkwa ngkwenhel aylperl-alha, pwet sandal ngkwenh-atherrel-then.” Peter arnkwel-anem aylpek. Ikwer-penhan angel-el renh ilek, “Arnkwa kwet ngkwenhel aylpa, ayenh-anem apentemel ingkern-they!”