4Peter-el-anem angka ikwer-rnem ilek,
5“Ayeng Joppa tawen-el anenh. Arlta ingwerelan ayeng Akngey-warl angkek, ayeng ankwanem aynterl-arrernek, atha altyerr-anem arek. Atha arek angel-el ampwal kalikw ilkwapeny alker-they atwarrelhilek atyeng-warl.
6Kalikw-apeny kwen-itwek, atha atnwenth ingwerek-ingwer arek, ahernel alheyel-rnem-then thip-rnem-then.
7Athanem awek ayenharl ilek, ‘Peter-ay, akemirray! Aker atwemel arlkwa!’
8Ayeng angkek, ‘Ingkartay, atha aker nthakenh arlkwey-angenh, ngarl weth arrwekel atnwenth arlkwekerr arrkngert angkek.’
9Athanem awek Akngey alker-they angkek, ‘Aray, Akngeyel alakenh-anyem ilenty, kel mwerr. Irrpelthirrey-angenh ikwer, ntwa aker arlkwetyek arwa alhewer.’
10Alakenh-anyem atyeng ilek irrpety-inger. Ikwer-penh Akngeyel kalikw-apeny alker-warl-anem aleth-antey akngeynek.
11Ikwer-penh artwa irrpety warl arriw-itwel rtneyarr-alhek. Caesarea tawen-they rernem apetyek.
12Itnweng Rlwartel ayenh ilek, ayeng alhewer alhetyek. Artwa Jesus-arl apenteyel 6-pel Joppa-areny-rnem atyeng-angkwarr alhek arrpemarl Caesarea tawen-warl. Aley rernem anwekantherr-itwel aneyel. Cornelius-kenh warl-warl anwantherr aylpenhek.
13Cornelius ranem anwekantherr ilek angel-elarl ikwer-warl aremirrek. Angel-el renh ilanthek, ‘Angkakert Joppa-warl thwena, Simon ikwer yangkelhetyek. Simon itna ingweran Peter-arl.
Acts 11
Acts 11:4-13