Acts 11:14-24

¹⁴Simon Peter ranem ngkweng angka Akngey-kenh iletyek, ntwa angka Akngey-kenh iterl-aretyek. Akngeyel arrenhantherr ingkerrenh itethileyenh.’

¹⁵Ayeng Cornelius-kenh-rnemek angkek. Itnweng Rlwart ra ikwer-rnem-warl antelhek-anem, ra arrwekel anwekantherr-warl antelhek-apeny.

¹⁶Ayeng iylpangkek-anem, Ingkartarl anwenhantherr arrwekel ilek, ‘John-el ingkerrenh kwatyelant baptise-emelem. Akngeyel arrenhantherr Itnweng Rlwartelant baptise-emelem.’

¹⁷Athanem iterl-arek, rernemarl Ingkart Jesus Christ tnakem, anwantherr renh tnakeyel-apeny. Akngeyel-anem Itnweng Rlwart renh thwenek ikwer-rnem-warl, rarl renh anwekantherr-warl arrwekel thwenek-apeny. Alakenhaym ayeng nthakenh Akngeyek irrpelthirrey-angenh.”

¹⁸Rernem Peter awek-penh rernem akateyelpek-anem ilterrey-angenh. Rernem Akngey-anem tnakek. Rernem angkerrenh, “Innganem Akngey Jew-weny-rnemek yangkelhek, rernem ikwer-warl angkepirretyek, rernem-anem iteth intem-antey anetyek.”

¹⁹Stephen ipmek atwek-penh, Jew-rnemel Jesus-arl apenteyel-rnem atwetyek alwernek. Jesus-arl apenteyel-rnem Jerusalem-angkwarr apmer arrpanenh-warl arlperrtyirrek, Akngey-kenh angka ilerl-apayntetyek, Jew-rnemekant, apmer Phoenicia-itwek, apmer Cyprus-itwek, apmer Antioch-itwek.

²⁰Ikwer-penhan Jesus-arl apenteyel irrpety apmer Cyprus-areny Cyrene-areny-rnem-then tawen Antioch-warl alhek, angka Jesus-kenh akalty-anthetyek artwa Greek-arl angkeyel-rnemek.

²¹Ingkartel renh-rnem rlterrkilek. Akngerrel-anem Ingkart renh tnakek, ikwer-warl angkepirremel.

²²Jerusalem tyaty-areny ingwer-rnemel awek, rernemarl Ingkart-warl angkepirrek, rernem-anem Barnabas renh thwenek Antioch tawen-warl.

²³Antioch-itwek Barnabas ra iterl-arek, Ingkartelarl renh-rnem arntarnt-arek, ranem inkwerelhek. Renh-rnem ilek, Ingkart-angkwarr aleth apenterl-ayntetyek.

²⁴Barnabas ra artwa mwerr anenh. Itnweng Rlwartel renh rlterrkilenh. Ra Ingkart tnakenh. Renh awek-penh akngerr ingwer-rnem Ingkart-angkwarr apenterl-ayntetyek angkepirrek arrpemarl.