Acts 11:12-28

¹²Ba Kanuma Kaobaisiyena i woniku kata yabata kata nae, ba kega nuwanuwaku ita kairagaraga kata kosi wai Gentile biyisi. Kata bigeruwana biyisi asi 6 yabata ka nae sebare kotoi ama wara i porai wai ana ku yove.

¹³Ba i wonikai mekabage kona aneya i rerematara kurina, ba i wona, ‘Wasaga ki poraisi ku Joppa, Simon Peter sina nuweni.

¹⁴Ba ina wonim kata mekabage kom ba am rakaraka koi ereonowami kona yawasa.’

¹⁵Ba a dagui ati sisiya saba, Kanuma Kaobaisiyena mekabage dagudagunai i gakira kurikai wai nanakasike i gakira kurisi.

¹⁶Damanina ba Bada i wona wai a nosi, ‘John okowai i babataito, ba komi kona Kanuma Kaobaisiyenai kona babataito.’

¹⁷Abisiri yai God Gentile biyisi, puyo i berisi wai yebo kota kesanina i berita. Maranai Iesu Keriso wabanai tai geruwana. Ba yauku kotoi wai, God ana keta ata vera papari.”

¹⁸Maranai mutusi Peter ana sisiya si nonori wai bigesaira si boterei, ba si dagui God si bokabakabari. Si wona, “Ta kinakinani kata God Gentile biyisi yebo i nuwanuwanisi wai si tombaubauna meyisi ba yawasa mama damanina si yauni.”

¹⁹Ba Stephen si kaobigoyoni ba si kasibunui murinai, bigeruwana biyisi si tupaketowanisi wai si vera si kasi buburanisi. Mutusi si nae ku Phoenicia kupurina, Cyprus neyarinai, ba Antioch meyaga kaikaponai Syria kupurinai, God wonana Jew biyisi wata kurisi si rumamarei.

²⁰Saba bigeruwana biyisi mutusi Cyprus yai si nae, ku Antioch ba Cyrene yai si dagui, Bada Iesu Warana Gairena Gentile biyisi kurisi si raumamara.

²¹Bada ana maragata wai kosi yabata, wai Gentile biyisi koroto kaikapona si nuwabirabira, ba si geruwana.

²²Ba bigeruwana biyisi Jerusalem kamonai si nonori wai Barnabas si porai ku Antioch.

²³Maranai i verakasibau ba God ana bigairena matakirina i kita wai nuwagaire i bonuwei ba bigeruwana biyisi i kaobimaragasisi, kata nuwanuwasi tupanai Bada siti tumaganei.

²⁴Barnabas wai sebare gairena, Kanuma Kaobaisiyena i bonuwei ba ana bitumagana i rakata saki wai, pipiya pesarisi i botuvisi Bada kurina.

²⁵Damanina ba Barnabas Saul i nuveni i nae ku Tarsus.

²⁶Ba i panani wai i urabai i veramaga ku Antioch. Asi ruwamo namai bodu kesana bigeruwana biyisi yabata si mana ba koroto kaikapona si beyebeyisi. Kona maranai Antioch kamonai bigeruwana biyisi si yorisi Keresiyana.

²⁷Kosi marasiyai peroperoveta mutusi Jerusalem yai si wagawaga ku Antioch.

²⁸Kesana kamosi yai kana waba Agabus, dugu kesana kamonai i bomsiri ba Kanuma Kaobaisiyena ana maragatai i wonisi kata mara murinai kapoi ina tupuwa kupura ereonowana Rome kamonai. (Nikona wai Claudius ana bibadanai maranai.)