Acts 10:8-23

⁸Ba kosi awaika i tupuwa wai ereonowana i wonisi, ba i poraisi ku Joppa.

⁹Mara i tom rabisi pompom ai matapa si veraverakasibau ku kupurina, ba Peter i gae ku wadakupuna rupari kairavina.

¹⁰Ba soya i rabobo wai ana waina awaika kesana ita kani, saba kam karaku wata kamonai, si bobunagi kamonai kiyakiyaya i kinani.

¹¹Kata sapama i tamotatara ba sawara kesana sowo rutainina i kitai i gaigakira ku dobu.

¹²Ba sowona kamona wai aba payapaya bubausi yai ereonowasi tano ai te botete wai, ba manu kaidamona roborobosi.

¹³Damanina ba gamo i nonori i wona, “Peter, ke bomsiri ki kasibunuwana ba kuna kam.”

¹⁴Ba i kaobeyei, “Kega rubana Bada! Au yawasa kamonai kega meyana, ama dudura awaika goyogoyosi ba pudapudasi ebi taraparanikai wai ana kani.”

¹⁵Ba gamona i wona mena, “Maranai God, awaika i wosei gairena wai, kom kega kuna wona goyona.”

¹⁶Ba wosena kesanina i tupuwa mara tonu ba sowona si taina geyena meyei ku sapama.

¹⁷Ba Peter niko aba kinakinana i kinani wai nuwanuwana i kairagaraga, kata basuna wai awaika, ba Cornelius pipiya i poraisi wai si verakasibau Simon ana ku yove.

¹⁸Ba si toiruba kata namai Simon Peter i mamana kona kega.

¹⁹Ba Peter ibi nuwanotanota mana, ba Kanuma Kaobaisiyena i sisiya kurina, i wona, “Simon, pipiya asi tonu te nuvenuvenim.

²⁰Ke bomsiri kuna gakira ba yabata kona nae, kega kuna kumara kosi wai yauku ai poraisi.”

²¹Damanina Peter i gakira kurisi ba i wona, “Pipiyina ko nuwenuweni wai yauku nina. Ba awaika kairavina ko botu?”

²²Ba si kaobeyei si wona, “Yakai wai Cornelius, Rome biyisi asi bada kaikapona i poraikai ka botu. Ba kona wai God e kumakumarei, ba ana yawasa i gaire saki, ba Jew biyisi te bokuwayei. Ba Aneya kaobaisiyena i wonei kata kom kuta botu kurina ana ku yove, ba awaika warana kuti sisiyei wai ita nonori.”

²³Ba Peter kana wagawaga i urabaisi ku yove ba namai si dauwa. Ba mara i tom wai, kona yabata si tauya si nenae wai Joppa bigeruwana biyisi mutusi si kibisi.