Acts 10:25-44

²⁵Maranai Peter i verakasibau ku yove wai Cornelius, Peter i kaikaivi, ba i bopepeta i gakira ku kaena mena ere bokuwayina.

²⁶Saba Peter Cornelius i taina bimsiriyei, ba i wonei, “Ke bomsiri, yauku kona pipiya mom kom rutainim.”

²⁷Ba yabata si sisiya si riuriu ku yove kamona wai Peter pipiya pesarisi si gaenisi si mamana wai i kinanisi.

²⁸Ba kurisi i wona, “Ko kuiri kata Jew biyisi wai kega rubarubana Gentile biyisi yabata sini kapuisi. Saba God i beyiku kata kosi kega ana kaobigoyonisi kona ana wonisi pudapudasi.

²⁹Kona kairavina maranai wasaga si nae sita urabaiku wai, kega a potai ba a tauya yagiyagina a botu. Kuta woniku, awaika kairavina ku wona wai a botu?”

³⁰Damanina Cornelius, Peter i kaobeyei, “Mara bai bataina murinai, kao nikasike rubana 3:00 au yove kamonai a rupari, ba sebare kesana kana gara poepoena ba mata kamokamosina, yagiyagina wata naoku ai i msiri.

³¹Ba i woniku, ‘Cornelius, am pari God i nonori ba am berena, moyamoyakisi kurisi wai i kinani.

³²Kata karaku nina wasaga ki poraisi, si nanae ku Joppa ba sebare kana waba Peter sina urabai. Kona wai Simon ana yove yai e mamana. Ba Simon wai aba payapaya kwapirisi yai sawara e wosewose ba ana yove wai tore yai.’

³³Kona kairavina ai pora yagiyaginisi si nae kurim, ba i gaire saki kata karaku God gwabiti yai ba awaika ereonowana Bada i wonim wai kuna wonikai.”

³⁴Damanina Peter sisiya i dagui, i wona, “Karaku mosi a kuira kabitamni kata God kurina wai ereonowata kesanita.

³⁵Saba dobu tompipinina iyabosi wata God te naganagarei, ba wose totorisi te wosewose wai kosi ereonowasi karinai.

³⁶Niko sisiya God i porai Israel biyisi kurisi wai ku kuiri, nuwanuba warana gairena Iesu Keriso i botuwei. Ba kona wai ereonowata ata Bada.

³⁷Ba awaika Judeai i tupuwa wai ko kuira, Galilee yai i dagui, John babataito warana i raumamarei murinai?

³⁸Ba God ana Kanuma Kaobaisiyena ana maragata, Iesu Nazareth biyina i bonuwei ba i yewo neubuwa wose gaigairesi i wosewose, ba kanuma goyogoyosi pipiya kamosi yai si mamana wai, ibi yawasisi kairavina God mamanina ibi baisi.

³⁹Ba Iesu awaika ereonowana i wosei Jew biyisi asi kupurai, ba Jerusalem kamonai wai, yakai ereonowana matakiyai ka kinani, ba namai si kasibunui ba si tuparatui.

⁴⁰Ba kao bitonuina murinai God ibo bimsiri meyei, ba i wosei i rerematara kata sita kinani.

⁴¹Ba i rerematara wai kega pipiya ereonowasi kurisi. Ba yakai ka kinani, rabobo ai i bomsiri ba ka kam yabata.

⁴²Ba i kaotuneikai, pipiya kurisi kata rumamara. Ba God maragata i berei kata raoboraobosi ba yawayawasi ini buibuiyisi.

⁴³Ba peroperoveta ereonowasi sini mamatara pipiya ereonowasi kurisi kata, iyabosi wata kana wabai sini geruwana wai asi piragagoyosi ina notataveyisi.”

⁴⁴Ba Peter ana sisiya karakuwata ibi sisiyei, ba Kanuma Kaobaisiyena i gakira, iyabosi niko wara si nonori wai kurisi.