Acts 10:2-23

²Ir be’ nma liyor ngak Got u wan’; me ir nge urngin e girdi’ nu tabinaw rok e yad ma meybil ngak Got. Ma ayuweg piyu Israel ni pi’in gafgow, ma yugu ma meybil ngak Got.

³Gonap’an e dalip e kolok ni mithig yal’ mi ni piliyeg e changar rok, nge guy ba engel rok Got nike yib nga naun nge yib i ga’ar ngak, “Kornelius!”

⁴Me lik’ath ngak fare engel nike tamdag me ga’ar, “Be mang?” Me fulweg fare engel ni ga’ar, “Got e bfel’ u wan’ e meybil rom nge maruwel ni kam tay ni ga be ayuweg e pi’in gafgow, ma be leam nigem.

⁵Ere mol’oeg boch e pumo’on nga Joppa ngranod ra pininged be’ nib mo’on ni Simon fithingan, ni ku yima pining Peter ngak.

⁶Ya ir ba milekag ni be par u tafen be’ nma fal’eg rogon keru’ e gamanman ni Simon fithingan, ni bay e tabinaw rok u to’oben e day.”

⁷Ma aram me yan fare engel ni yib i non ngak, me pining Kornelius l’agruw i tapigpig rok nge ba salthaw, ni be’ nma liyor ngak Got u wan’ ni ir bagayad fa pi’in yad ma pigpig ngak Kornelius.

⁸Me weliy ngorad e n’en nike guy nge tin ke rung’ag me l’oegrad ngranod nga Joppa.

⁹Me reb e rran riy, ni aram e kranod ni kar chugurgad i yan nga Joppa, me yan Peter nga daken e chigiy ko fare naun nike misiw’ ni fan e nge meybil.

¹⁰Me yib e bilig ngak, me finey ni manga yigi abich; ma nap’an ni yibe ngongliy rogon e ggan mi ni piliyeg e changar rok.

¹¹I guy e tharmiy nike mab me guy ban’en ni be yib nga but’ ni bod ya’an bangi mad ni ba ga’ yang ni kan nguchuruy nga but’ u aningeg i tabthungen.

¹²Ma urngin mit e gamanman u daken e binaw ni bay u lan, nge gamanman nma sirgig u but’ i yan, nge arche’ ni malboch.

¹³Me ga’ar ba lam ngak, “Peter, mu sak’iy; ngam li’ ngam longuy!”

¹⁴Machane me ga’ar Peter, “Somol, dabiyag ni nggu rin’! Ya dawor gu longuy ban’en nib tagan ni ngan longuy ara de be’ech nrogon ni bay ko Motochiyel.”

¹⁵Miki non fare lam ngak bayay ni ga’ar, “Dariy ban’en ni ngam leamnag nde be’ech ni fa’anra keyog Got nike be’ech.”

¹⁶Ren’em e yodorom ni dalip yay; ma aram mi ni fulweg fare n’em nga tharmiy.

¹⁷Me par Peter ngi i leamnag fan e ren’em ni kan piliyeg e changar rok ke guy. Ma aram e fapi pumo’on ni l’oegrad Kornelius e kar nanged e gin ni bay e naun rok Simon riy, ni aram e kar sak’iygad nga langan e garog riy.

¹⁸Miyad pong ngar fithed ni lungurad, “Bay be’ nib milekag u roy ni Simon Peter fithingan?”

¹⁹Ka be guy Peter rogon ni nge nang fan e ren’em ni kan piliyeg e changar rok ke guy me ga’ar fare Kan Nthothup ngak, “Mu tiyilim! Ke taw dalip i pumo’on ngaray ni yad be guyem.”

²⁰Ere mfal’eg rogom ngam man nga but’, ma dab mmaruwar ko ngam un ngorad fa danga’, ya gag e kug l’oegrad.”

²¹Ma aram me yan Peter nga but’ me ga’ar ngak fapi pumo’on, “I gag fare mo’on ni gimed be gay. Mang ni kambad?”

²²Me lungurad, “I kapten Kornelius e ke l’oegmad. I ir be’ ni bfel’ nma meybil ngak Got mma tay urngin e girdi’ nu Israel fan. Keyog ba engel rok Got ngak ni nge non ngom ngam man nga tabinaw rok, nge yag ni rung’ag e tin bay ni ngamog ngak.”

²³Me yog Peter ngorad ni ngarbad nga naun, miyad par u rom e neap’ nem. Me reb e rran riy me fal’eg rogon nge un ngorad; ma boch pi walagrad ni girdi’en Jesus u rom u Joppa e ra uned ngorad ngranod.