Text copied!
CopyCompare
Wedau Mark - Acts - Acts 10

Acts 10:1-37

Help us?
Click on verse(s) to share them!
1Au Caesarea oroto wavana Cornelius, tauna mai Italy sorodia boruna ai bada.
2Tauna rava jijimanina ma patupatutuna, ma ana numa ravai maiteni God taurauduneleina. Ma molamolakai i paipaina-kauei ma marana patapatai i raraupari God awarina.
3Au bigai tagogi 3 oklok nanare i raraupari ma ana au inana, God ana anela au aiaina i ʼnanai, i nei awarina ma i riwa, “Cornelius!”
4Cornelius ana rovona anela i ʼnana-tunutunui ma i riwa, “Au bada, menanare!” Ma anela i paribelei, “Am pari ma am verena molamolakai awarii, i ḡeta God awarina me pulo apuapunana ḡabuna.
5Ma marina nelara ḡelaui ma paritawanei au Joppa ma ravana wavana Simon wavana ḡelauna Peter ina taravainiai.
6Tauna rava wavana Simon, ḡamoḡamo opina taurauḡaroḡaroeina awarina e mamae gera au ririvana.”
7Maranai anela i nae, Cornelius ana taunola ruaḡa i ḡoreiai, ma ḡelauna lamna sorodia, tauna ana tauvipaipai, tauna God tauvitumaḡaneiana.
8Tauna aiwai anatapuna taui i riwei ma i paritawanei au Joppa.
9Maratomna au benai nanare maranai nelarai Joppa i tuḡereḡerei, Peter i ḡeta numa au tepana da ita raupari.
10Ma am i ʼraḡe ma i ḡoei da aiwai ita ani, maranai taui lam i vovokaukauei, ma Peter matanei rauboni i ʼnanai.
11I ʼnanai mara i wanatawanei ma purapura inanana me puru ḡaeḡaena au adana 4 i vojijini ma marei i tere-ḡaireiai au dobu.
12Au orana lamna sia tapuna ma tapuna, tetetei me mota ma kiu au aidamo lavelavei.
13Ma pona i riwa, “Peter ma vomairi, ma viraḡena ma ma am!”
14Wate Peter i paribelei, “Eḡa! Lamna eḡa melanai ana kauei. Eḡa melanai lam viviḡana ata am-dadani.”
15Wate pona i babani me, “Aiwai God i viviaiainia, eḡa ma riwa da i apoapoe.”
16Mara tonuḡa wenanare i tupua ma me marana puruna i ḡaiana-melei au mara.
17Ma Peter aiwai i ʼnainanai anona i vinua-notenotei, nanare ma Cornelius nelara i paripari-tawanei, taui Simon ana numa i nelaḡai ma i ḡeta ana au metaeta.
18Taui i paridadana, “Weka rava wavana Simon-Peter e mamae bo eḡa?”
19Peter amapo da wei i vivinua-notenotei maranai Arua vivivireina i riwa, “Simon, nelara tonuḡa e baibaiem!
20Lamna aubaina ma vomairi ma ma ḡaira au gabaura, eḡa ma geduai, aubaina tau a paritawanei awarim.”
21Peter i ḡaira ma awarii i riwa, “Taumi tau o baibaieu bo, Ami ḡoana aiwai?”
22Ma nelarai i paribelei, “Tauai Cornelius mai Rome ai sorodia ai bada i paritawanelai, tauna rava jijimanina ma God tauvoepaepana, ma mai Jew maḡamaḡaui tauna e vivivirei. Anela vivivireina i riwei da uta nei ana au numa da aiwai u araramanei uta riwei.”
23Ma Peter nelarai i ḡorei da i rui au numa ma kampa i matave. Ma maratomna anatapui i nae, Tauvitumaḡana ḡelaui au Joppa maiteni i vomairi.
24Ma au pom ḡelauna taui au Caesarea i ḡeta. Cornelius taui i paipaini, ma ana numa ravai ma ana rava i ḡorei da i nei.
25Ma maranai Peter i ruirui au numa, Cornelius Peter i ʼnanai ma i mae-ḡaira au ae karena ma ana vivirana i raudune.
26Wate Peter tauna i voepai ma i riwa, “Ma vomairi, Tau rava ota me tam.”
27Peter ma Cornelius i bababani ma i ruirui au numa. Ma i ʼnanai da patara tauna i paipaini.
28Peter taui i riwei, “Taumi o aramana-kauei da tauta mai Jew ata tarawatu e viviḡaeta da Jentail maiteni tana mae-gogona bo tana raugenari. Wate God i viatataieu da eḡa rava ana ḡorei rava apoapoena bo miramirana.
29Lamna aubaina maranai u vibaḡaiu da ata nei, Tau au nota aiainei a nei. Tau ata pari-dadanem, Marina ma riweu aiwai aubaina au riwa u paritawanei?”
30Cornelius i paribelei, “Au benai wenanare au pom 4 marina i kwa, au numa a raraupari, nanare ma rava ana gara ararapoirina ma namanamarina au naoiu i raumairiei.
31Ma i riwa, ‘Cornelius! God am pari i nonori ma am verena molamolakai awarii i vinuaiaiei!
32Ma nelara ma paritawanei au Joppa da Simon e ḡoreḡorei Peter awarina. Tauna Simon, ḡamoḡamo opina taurauḡaroḡaroena ana au numa e mamae.’
33Lamna aubaina da am riwa laḡilaḡina ava a paritawanei, ma i ai da tam u nei. Tauai anatapuiai marina weka God au matana a vivipaipai da Bada aiwai i riwem ana nonori.”
34Ma Peter babani i raukarei, “Marina a inana-kauei da God rava anatapui e vaivaia da tagogina.
35Wate dobu dobuai ravai God e vivivirei ma kaua aiaii e kaukauei, Tauna wei ravai e ḡoeḡoei,
36Taumi o aramanei God Riwana Aiaina i paritawanei mai Israel awarii da rava ina mae-kaua God maiteni, maranai Iesu Keriso ina vitumaḡanei ma tauna ai lawana ina vibadei.
37Taumi o aramanei Iesu aiwai i kauei Judea au anatapuna, au Galili i vikarei maranai John babataito ai kaua i raugugulei.

Read Acts 10Acts 10
Compare Acts 10:1-37Acts 10:1-37