Abostolo 13:31-45

³¹Hovelahai vani moaga au subuta au abuhi Galili isi Dielusalemae oimale kebiae lohonu. Iale ata keabulike Iselala ata haivema.

³²Iale no hotoe dua keike mai la haiveho loholu.

³³Dilavau Iesu etuvage hovelahage au subuta nahie buluveho louale ke nahateu nova nahiemo velemanu. Deividiu Samusi bukamo hoto ke nahate hisaliai avoe, ‘Dau a Mama seleve. Isege au di mo.’

³⁴Ige Aisaiau au bukamo Dilava hoto hisaliai avoe, ‘Di Deividiho vaveve mole dua loui mamoale ke nahate dana aemo vai.’ Hoto ke ihuu koseanu. Dilavau Iesu etuvage hovelahale au bae tota hatilivebene.

³⁵Ige Deividiu tota Samusi bukamo hisaliai avoe, ‘Dilavau bae au esemu tumute ke halege au bae gulimo ulivebene.’

³⁶Nahi hilokage Deividiu Dilava isivimo au esemu kebia tedaevenata hatige abu mai guliage uoholinu. Iale ata tumute keu Deividi holioholinu.

³⁷Isito ata mole igae Dilavau etuvale keu gulimo uoholisito tota hovelahanu.

³⁸“Di haokuvuia, Iesu keike la vaveve toela bahata ulihage uoholinu.

³⁹Iale lana la uvu mai Iesuemo mavoge auna la vaveve toela la huhulahamale ke ulihai. Kateige Dilavana laheho loui kosea, ‘Laeau di nimo duave.’ Mosese menakau bae laemo kateale valivebene.

⁴⁰Katealemo huhuihuhuie dua vave. Onoilage belovetaeau subuta louale kou laemo lohoma.

⁴¹Beloveta keau Dilava hoto hisaliai avoe, ‘Evive. Ata molena lohoniege di aike laemo vamale ke louge la bae hotove evilivebene. Iale lana di hoto louale ke kabebihavoliege haluvive.’”

⁴²Bolou kateai louge uoholisege au Banabasiti halevasege ataeau namigevei avoe, “Gabie bula kemo hoidevei loholive tota hoto degomole loui no haiveve.”

⁴³Keau kateai lougeto Bolou Banabasiti halevai tisege ata degomoleau ehovei tilu. Kebia degomoleau Diue ata seleve. Isege degomoleau Diue ata holioholisito Dilava hoesehavoma. Ige Bolou Banabasiti abuho loui avoe, “Dilavau nahie huhuevei nahie hoesegevemale ke huhulahai la evievimo negolahageve.”

⁴⁴Iniale bula molemo o ke ataeau bahata lohoale isiviale Bolou Kosive hoto louge abu evisi.

⁴⁵Ige Diue kosiveau ata moagamoaga elegeveime Bolo maina mai isime avuho itumulahai hotove hamai avuho hotoe toela loui aiohavolu.