A Umana Kakailai 81:2-15

²Avat a puak ra kakailai, ma avat a par ra kudu, Avat a ubu ra bo na ngap ma ra pagol,

³Avat a vu ra tavur ta ra gai ba i kama, Ba ra gai i palaioko ure kada bung na lukara.

⁴Tago damana ra varkurai ure Israel, A vartuluai kai ra God kai Iakob.

⁵I tibe tar ia tai Iosep upi ra varvai, Ba i vana rikai upi na kure ra gunan Aigipto. Iau ga valongore vatavuna ra tinata kai tikai ba pa iau nunure.

⁶Iau tar tak vue ra kinakap ta ra ul a varana, A ura limana dir a langalanga kan ra rat.

⁷U ga kail ba u ga ki na malari, ma iau ga valaun u; Iau ga torom tam ba iau ga ki ivai ta ra ivarat, Iau ga valar u ta ra tava Meriba. Sela.

⁸Kaugu tarai, avat a valongore, ma ina varvai bulu ta vavat; Israel, gala ava valongore iau!

⁹Koko ta enana god na tur pire vavat, Ma koko avat a lotu tadav ta enana god.

¹⁰Iau ra Luluai kavava God, Nina i ga ben vairop avat kan ra gunan Aigipto; Avat a manga panganga, ma ina vangan ra ngie i vavat.

¹¹Ma kaugu tarai pa dia torom ta ra nilaigu, Ma Israel pa i mainge iau.

¹²Io, iau nur tar diat ta ra leo na nuknuk i diat, Upi diat a mur uka kadia vartovo iat.

¹³Gala kaugu tarai diat a valongore iau! Gala Israel na vanavana ta kaugu lavur nga!

¹⁴Gala ina uvia lolole pa kadia lavur ebar, Ma ra limagu na tur bat diat dia ki na vargegelenai me.

¹⁵Diat dia milikuane ra Luluai, diat a ongo boko tana, Ma na damana pire diat pa na mutu.