A Umana Kakailai 78:2-12

²Ina tatike ra tinata valavalar, Ina vatang ra umana tinata i pidik, nina amana iat tana.

³Nina da tar valongore ma da tar nunure, Ma ra umana tama i dat dia ga ve dat i tana.

⁴Pa da ive diat kan ra lavur natu i diat, Ma da vaarike ra umana pite varpa kai ra Luluai ta ra taun tarai namur, Damana bula ra dekdekina ma ra lavur enana papalum i ga pait ia.

⁵Tago i vatur tika na varvai pire Iakob, Ma i tibe tar tika na varkurai tai Israel, Nina ba i vartuluai ure pire ra umana tama i dat, Ba diat a tovo ra umana natu i diat me.

⁶Upi ra taun tarai namur na nunure diat, maia, a umana bul ba da kava boko diat; Diat a tut, ma diat a ve ra umana natu i diat;

⁷Upi diat a nurnur tai God, Ma koko diat a valubane ra lavur papalum God i ga pait ia, Ba diat a torom uka ta kana lavur vartuluai;

⁸Ma koko diat a mur ra umana tama i diat, Tago a umana karduk diat ma ra umana tena varpiam, A taun tarai ba pa dia mal vadovot ra nuknuk i diat, Ma ra tulungea i diat pa i tur padikat pire God.

⁹A umana natu i Epraim ba dia kap vargal ma dia vatur ra panak, Dia ga takap uka ta ra bung na vinarubu.

¹⁰Pa dia torom ta ra kunubu kai God, Ma pa dia mur kana vartovo.

¹¹Ma dia valubane ra lavur magit i ga pait ia, Ma kana lavur papalum ba i ga ve tar ia ta diat.

¹²I ga pait ra umana magit na kinaian ta ra luaina mata i ra umana tama i diat, Ta ra gunan Aigipto ma ta ra langun Soan.