A Umana Kakailai 77:1-17

¹Kai nina i lue ra kakailai; kai Iedutun; a kakailai kai Asap. Iau manga kail tadav God, Maia, ina manga kail tadav God, ma na valongore iau.

²Damana ta ra e iau ga ki na malari tana, iau tikan upi ra Luluai; Iau ga tulue vaarike ra limagu ta ra marum, ma pa iau ngo, A tulungeagu pa i mainge ra varmaram.

³Ba iau ga nuk pa God, iau ga ngarangarao; Ba iau nununuk ma ra niaring, a tulungeagu i matmat ika. Sela.

⁴U ga tur bat ra pilpil na matagu, upi koko ina va mat; ga purpuruan ra balagu ma iau mama tata.

⁵Iau ga nuk pa ra e amana tana, Ra umana tataun lualua.

⁶Ina nuk pa mule kaugu kakailai ta ra marum; Boina ina nununuk ta ra balagu; Ma ra tulungeagu i ga titir dari:

⁷Dave, ra Luluai na vung vatikene vue avet ta ra lavur tataun? Ma pa na varmari mulai bar?

⁸Dave, i tar par kakit kana varmari? I pak vatikai vang kana tinata na varvatading?

⁹Dave, God i tar valubane upi na pait ra varmari? I tar banu bat vake bar kana bala na varmari ure kana kankan? Sela.

¹⁰Ma iau ga biti: Iau purpuruan go, Tago i enana ra lime tuna ra Ngala Kakit.

¹¹Ina vatang ra lavur papalum kai ra Luluai, Maia pa, ina nuk pa mule kaum lavur papalum na kinaian ba amana tana.

¹²Ina nununuk ta kaum lavur papalum kabila, Ma ina nuk pa kaum lavur bibili.

¹³Kaum mangamangana, God, i tar gomgom; Akave mulai ta ngala na god da kada God tuna?

¹⁴U nam ra God, nina ba i papait ra lavur magit na kinaian. U ga rada ra dekdekim livuan ta ra umana vuna tarai.

¹⁵U tar valaun kaum tarai ma ra limam, Ra umana natu i Iakob, ma ra umana natu i Iosep. Sela.

¹⁶A ta i gire u, God, A ta i gire u, ma i burut, A marumian kabila i dadadar.

¹⁷A umana bakut dia lingire ra bata, A lao i pangpagur; Kaum lavur meme dia pala ia vurvurbit.