A Umana Kakailai 71:2-19

²Una ga valangalanga iau, ma una ga valaun iau ta kaum takodo na mangamangana; Una valongore iau, ma una valaun iau.

³Una da ra dekdek na bakbakit piragu upi ina vala vilau ruk tana; U tar varkurai ba da valaun iau, Tago u kaugu vat ki ma kaugu dekdek na pal na bakbakit.

⁴Kaugu God, una valaun iau kan ra lima i ra tena varpiam, Kan ra lima i ra tutana i gegagege ra nuknukina, ma pa ta varmari i ki ta ra balana.

⁵Tago iau nurnur tam, Luluai God, Papa ra kilala iau ga bul tana, iau nurnur tam.

⁶Papa ra bung di ga kava iau tana, iau tur bokon tam; U kaugu tena minamal papa ra e iau ga ki boko ra bala i nagu tana; Ina pite vatikene pa u.

⁷Mangoro dia kakaian tagu; Ma u kaugu dekdek na bakbakit.

⁸A ngiegu na buka ma ra pite varpa, Ma ra tinata na variru piram a bungbung parika.

⁹Koko una vung vue iau ba iau kua; Koko una vana. balakane iau ba ra dekdekigu i papait na panie.

¹⁰Tago kaugu lavur ebar dia pirpir ure iau, Ma diat dia kiki uai upi iau dia tata varurung,

¹¹Dia biti: God i tar vana balakane; Avat a korot mur ia, ma avat a kinim pa ia; Tago pa ta na akari ba na valaun ia.

¹²God, koko u ki vailik kan iau; Kaugu God, una rurut upi una maramaravut iau.

¹³Boina ba ra umana ebar ure kaugu nilaun diat a vavirvir ma diat a panie, Ma diat dia ling na vakaina iau, boina ba na tup diat ra vavirvir ma, ra niruva.

¹⁴Ma iau, ina ki nunur vatikai, Ma ina vangala pa mule ra pite varpa piram.

¹⁵A ngiegu na varvai ure kaum mangamangana takodo, Ma ure kaum valavalaun a bungbung parika, Tago i dekdek upi ina vatang ot pa ia.

¹⁶Ina tur pa ia ma ra umana dekdek na papalum kai ra Luluai God, Ina vatang kaum mangamangana takodo, maia, kaum kakika.

¹⁷God, u tar vateten iau papa ra e iau ga bul tana; Ma tuk tar gori iau tar vaarike kaum lavur enana papalum.

¹⁸Maia, ma ba iau patuan boko, ma ba ina kua, koko una vana kan iau; Tuk tar ta ra bung ba iau ga vaarike tar ra ongorim ta ra taun tarai namur, Ma ra dekdekim ta diat tikatikai ba diat a laun namur.

¹⁹God, kaum mangamangana takodo i ngala kakit, U, u tar pait ra umana ngala na magit, God, to ia mulai ba amur a vardada me?