A Umana Kakailai 57:1-8

¹Kai nina i lue ra kakailai; a tiun Al-Tasket; a Miktam kai David, ba i lop kan Saul ta ra babang. Una mari iau, God, una mari iau; Tago ra tulungeagu i rivarivan tam, Ma ta ra vavai na bebeam ina rivarivan, Tuk tar ta ra bung ba na ngo ra umana kaina magit.

²Ina kail tadav God, ra Ngala Kakit, Tadav God nina i maramaravut iau.

³Na vartuluai marama ra bala na bakut ma na valaun iau, Tago nina i mainge ba na konome iau i tar varvul. Sela. God na tulue vaarike kana varmari ma kana dovotina.

⁴A tulungeagu i ki livuan ta ra umana leon; Ina va livuan ta ra umana ebar dia ngangap da ra iap, Maia, livuan ta ra tarai Ba ra ngie i diat i da ra rumu ma ra pu, Ma ra karamea i diat i da ra pakat na vinarubu i mangi.

⁵Una vangala pa u mulai, God, Una ki ak ta mumur ma ra bala na bakut, Ma kaum minamar na ki ta ra rakarakan a gunagunan.

⁶Dia tar vaninare ra ubene ure ra kaugu, A tulungeagu i bilua; Dia tar kal ra tung ure ian, ma diat iat dia tar bura tana. Sela.

⁷God, a balagu i tur padikat, i tur padikat, Ina kakailai ma ina pite varpa.

⁸Una tavangun, a tulungeagu; Amur a tavangun, a kaur ma ra pagol, Iau iat ina tavangun ta ra kavunvun iat.