A Umana Kakailai 55:7-22

⁷Ea, gala damana, gala ina ga vana irai vailik, Ina ga kiki arima ra pui. Sela.

⁸Gala ina kavie ra vinavana upi ta rivarivan, Kan ra ngala na vuvu ma ra kalivuvur.

⁹Luluai, una vamutue kadia tinata, ma una vapurpuruan ia, Tago iau tar gire ra vinarubu ma ra varngangar ta ra pia na pal.

¹⁰Ta ra keake ma ta ra marum dia vana vurvurbit i tana ta ra ul a liplip; A varpiam ma ra bilak na mangamangana i ki livuan tana.

¹¹A vinirua i tur livuan tana, A varvaur ma ra vartuam pa i vana kan ra lavur ngaina.

¹²Tago vakir ta ebar i vul iau; Gala ta ebar, gala ina ki vamadudur pa ia; Ma vakir nina i milikuane iau i pite vangala pa ia mulai; Gala damana, gala ina paraparau kan ia;

¹³U kaka u ga pait ia, u ra tutana ba dor varogop, Dor ga varbete ma dor ga talaina tuna.

¹⁴Dor ga pirpir ma i ga kalami kador tinata, Dor ga vanavana ta ra kuba i God, dat ma ra kor.

¹⁵A minat na tadav vakaian diat, Diat a kuba ta ra ruarua na tulungen ba dia laun bulu boko; Tago a varpiam i ki ta ra kuba i diat, maia, ma ta ra bala i diat.

¹⁶Ma iau, ina kail ika tadav God, Ma ra Luluai na valaun iau.

¹⁷Ta ra ravian, ma ta ra malana, ma ba ra keake i ki tur, ina araring ma ina oir, Ma na valongore ra nilaigu.

¹⁸I tar valangalanga bulu ra tulungeagu upi koko diat a maravai piragu, Tago mangoro diat ave varngangar ma diat.

¹⁹God na valongore ma na vakadik diat, Maia, nina i tar ki na varkurai papa amana. Sela. Na vakadik diat ba pa i enana kadia kini, Ma diat ba pa dia burut ure God.

²⁰I tar tul vaarike ra limana ure diat dia ga ki na bartalaina me, I tar vatamam vue kana kubunu.

²¹Kana tinata i ga duladula da ra bira; Ma ra balana i buka ma ra vinarubu ka, Kana lavur tinata dia manga madu, ma ra dangi pata, Ma dia varogop uka ma ra pakat na vinarubu di ele pa ia.

²²Una nur tar kaum kinakap tai ra Luluai, Ma ia iat na onge u; Pa na vung vue tuna ra tena takodo upi na takari.