A Umana Kakailai 44:11-19

¹¹U tar tul tar avet, ma ave varogop ma ra umana sip di poko diat Ma u tar vaki varbabaiane avet livuan ta ra umana Tematana.

¹²U ivivure kaum tarai ure ta paupau magit ika, Ma pa u pie pa ta tabarikik ma ra mataina.

¹³U vaki avet da ra magit na milmilikuan pire ra umana talai vevet, Ave da ra magit na vavirvir ma ra magit na varkulumai pire diat dia ki kikilane avet.

¹⁴Ave da ra tinata na varvakok livuan ta ra lavur Tematana, Ma dia loloe ra ulu i diat ta vevet.

¹⁵A bungbung par i tup iau ra niruva, Ma ra vavirvir i turup ra matagu.

¹⁶Ure ra tinata kai ra tena varkulumai ma ra tena varvul, Ma ure ra ebar ma ra tena varobo.

¹⁷Go ra lavur magit i tadav avet; Ma pa ave valubane u, Ma pa ave rara kan kaum kunubu.

¹⁸A bala i vevet pa i vana tapuku, Ma pa ave vana kan kaum nga,

¹⁹Upi una kita ngidangide avet ma avet a da ra uliran na gunan, Ma upi una vamalur avet ma ra malur na minat.