A Umana Kakailai 40:1-15

¹Kai nina i lue ra kakailai, a kakailai kai David. Iau ga kiki vovovon upi ra Luluai, Ma i ga lingan upi iau, ma i ga torom ta kaugu kinail.

²Ma i ga al vairop iau kan ra tung na vinirua, ma kan ra kaina pikai; Ma i ga vatur ra kaugu ta ra ul a vat i ta, ma i ga vapadikat kaugu vinavana.

³Ma i tar vaki ra kalamana kakailai ta ra ngiegu, Maia pa, a pite varpa tadav kada God; Mangoro diat a gire, ma diat a burut, Ma diat a nurnur tai ra Luluai.

⁴I ti doan nam ra tutana ba i nurnur tai ra Luluai, Ma pa i nuk pa diat i kolakolo ra nuknuk i diat, ma diat bula dia papait ra vartuam, pata.

⁵Luluai, kaugu God, i ti peal kaum lavur enana papalum, Ma kaum lavur nuknuk, nina ba u tar pait ot pa diat ure avet; Pa ta na mulai ba amur a varogop me; Gala ina varvai ma ina tatata ure diat, Gala i dekdek upi ina luk puput pa diat.

⁶Vakir u gugu ta ra vartabar, ma ra tinabar bula pa u gugu tana; U tar papa are ra talingagu; Vakir u mainge ra tinabar di tun tar ia, ma ra varporong bula pata.

⁷Io, iau ga biti: Ea, iau tar pot; Di tar tutumu ure iau ta ra pinpin na buk;

⁸Kaugu God, iau ga upi ina pait ra nuknukim; Maia, kaum vartovo i ki ta ra balagu.

⁹Iau tar varvai ure ra mangamangana takodo ta ra ngala na kor, Ea, pa ina tigal bat ra bul na ngiegu, U tar nunure, Luluai.

¹⁰Pa iau ga ive kaum mangamangana takodo ta ra balagu, Iau tar vaarike ra dovot na maukuam ma kaum valavalaun; Pa iau ga vapidik kaum varmari ma kaum dovot na mangamangana kan ra ngala na kor.

¹¹Luluai, koko una kamale kaum bala na varmari tagu; Boina ba kaum varmari ma kaum dovot na mangamangana dir a vaale bat vatikene iau.

¹²Tago ra umana kaina magit dia tur kikilane iau, dia vurot tuna. Kaugu varpiam i vila mur tadav iau, ma i dekdek upi ina tadaraka; I peal tuna, ma ra lavur pepe na ulugu pata, ma ra balagu i tar bilua.

¹³Boina, Luluai, una valangalanga iau, Luluai, una rurut ma una maravut iau.

¹⁴Boina ba diat par dia mainge ba diat a vamutue iau, Diat a vavirvir ma diat a purpuruan; Boina ba da pukue vatalil diat dia gugu ta kaugu kinadik, ma diat a ruva bula.

¹⁵Diat dia biti tagu: Ioi! Ioi! Diat a ki na uliran ika ure kadia vavirvir.