A Umana Kakailai 31:16-24

¹⁶Boina ba ra matam na pupua taun kaum tultul; Una valaun iau ta kaum varmari.

¹⁷Luluai, koko ina vavirvir, tago iau tar kail u; Boina ba ra umana tena varpiam diat a vavirvir, Ma diat a ki mut ta ra ruarua na tulungen.

¹⁸Boina ba ra umana tena vaongo diat a bombom, Nina dia nguk ma ra tinata ure ra tena takodo, I kolakolo ra nuknuk i diat ma dia milmilikuan bula.

¹⁹I ti ngala mat kaum varmari, nina u vung vake pi kadiat dia ru u, Nina u pait ia ta diat dia nurnur tam Ta ra luaina mata i ra tarai!

²⁰Una ga ive diat ta ra rivarivan ta ra luaina matam kan ra varpit kai ra tarai; Una ga vabakite diat ta ra pal na mal kan ra tinata na vartoto.

²¹Da pite pa ra Luluai, Tago i tar vaarike kana enana varmari tagu ta ra dekdek na pia na pal.

²²Ma iau, ta kaugu nirut, iau ga biti dari: Di tar vamutue iau ta ra luaina matam; Ma u ga valongore ke kaugu lavur nilul vovo, Ba iau ga tangi tadav u.

²³Avat a mari ra Luluai, avat par kana tarai na lotu; Ra Luluai i vaale bat ra dovot na tarai, Ma i manga balbali pire diat dia malamala luluai.

²⁴Avat a ongor, ma koko avat a burut, Avat par ba ava nurnur upi ra Luluai.