A Umana Kakailai 19:1-10

¹Kai nina i lue ra kakailai; a kakailai kai David. A lavur bakut i varvai ure ra minamar i God, Ma ra maup i vaarike ra papalum na limana.

²Tikatika na bung na keake i ve tar ia ta ra bung na keake mulai, Ma tikatika na marum i vamatotone pa ta ra marum mulai.

³A dovotina pa ta tinata ma pa ta vatavatang; Pa di valongore ra nilai dir.

⁴Kadir langun i tuk tar ta ra rakarakan a gunagunan par, Ma kadir tinata ta ra lavur ngungu na gunagunan mutu. God i tar pait ra kuba i ra keake tana,

⁵Nina ba i varogop ma ra taulai kalama i irop ta ra kubana, Ma i gugu da ra tena ongor i vutvut ta kana vinavana.

⁶Kana vinavana i tur pa ia ta ra ngu na lao, Ma i tuk tar mulai ta ra lavur ngunguna; Ma pa ta magit ba pa i kairane ra lapapuna.

⁷A vartovo kai ra Luluai i ko vurakit ma i valar ra tulungea i ra tarai; A varvai kai ra Luluai i dovot, ma i vakabinana diat dia tuptup.

⁸A umana togotogo kai ra Luluai dia takodo, ma dia vagagane ra bala i ra tarai. A vartuluai kai ra Luluai i gomgom, ma i vanana pa ra kiau na mata i ra tarai.

⁹A variru tadav ra Luluai i gomgom, ma i tur pa na mutu; A umana varkurai kai ra Luluai dia dovot ma dia takodo par.

¹⁰I topa ia ba da manga anan upi diat, ma koko da manga anan upi ra goled; Maia pa, ma upi ra ngala na goled ba i ngatngat bula, pata. Dia manga kalami ta dir ma ra bulit na livur Ma ra polo ta ra bulit na livur.