A Umana Kakailai 119:134-154

¹³⁴Una valaun iau kan ra tarai dia ki taun iau, Upi ina mur kaum lavur vartuluai.

¹³⁵Boina ba ra matam na pupua taun kaum tultul, Ma una tovo tar kaum lavur togotogo tagu.

¹³⁶A matagu i lulur na kaia, Tago pa dia torom ta kaum tinata na vartovo.

¹³⁷Luluai, u a tena takodo, Ma kaum lavur varkurai dia dovot.

¹³⁸Kaum lavur varvai, nina u ga tul tar diat, dia takodo, Ma dia dovot muka.

¹³⁹Kaum niongor i tar vaimur iau, Tago kaugu umana ebar dia tar valubane kaum tinata.

¹⁴⁰Kaum tinata i gomgom tuna, Kari kaum tultul i manamanane.

¹⁴¹Iau da ra bul vakuku ka, ma di milmilikuane iau, Ma pa iau nuk vue kaum lavur vartuluai.

¹⁴²Kaum mangamangana takodo i tur tukum, Ma kaum tinata na vartovo ia ra dovotina.

¹⁴³A purpuruan ma ra bunurut dir tabe vake iau, Ma ina gugu ka ta kaum lavur vartuluai.

¹⁴⁴Kaum lavur varvai dia takodo pa na mutu, Una vakabinana iau, ma ina laun uka.

¹⁴⁵Iau kail ma ra balagu par; Luluai, una torom tagu; Ina torom ta kaum lavur togotogo.

¹⁴⁶Iau tar kail tadav u; una valaun iau, Ma ina torom ta kaum lavur varvai.

¹⁴⁷Ba pa i ga lar boko, iau ga kail up u; Iau nurnur ta kaum tinata.

¹⁴⁸Ba pa di kia vue boko ra monamono na marum, iau tavangun Upi ina nununuk ta kaum tinata.

¹⁴⁹Una valongore ra nilaigu vardada ma kaum varmari; Una valagar pa iau, Luluai, vardada ma kaum varkurai.

¹⁵⁰Diat dia vakavakaina iau ma ra bilak na mangamangana dia maravai, Dia tar vana vavailik kan kaum tinata na vartovo.

¹⁵¹Luluai, u ti ki maravai, Ma kaum lavur vartuluai dia dovot.

¹⁵²Papa amana tana iau tar nunure ure kaum lavur varvai, Ba u ga vatur diat upi diat a tur tukum.

¹⁵³Una nuk pa ra mangana i tup iau, ma una valaun iau; Tago pa ina valubane kaum tinata na vartovo.

¹⁵⁴Una tata maravut iau, ma una valaun iau, Una valagar pa iau vardada ma kaum tinata.