A Tarai Levi 18:9-29

⁹Koko una va ma taim nina ba natu i tamam, ba natu i tinam, ba di ga kava ta ra gunan, ba ta ra gunan na vaira.

¹⁰Koko una va ma tubum, a natu i natum, a tutana, ba ta natu i natum, a vavina, tago diat a umana tubum iat.

¹¹Koko una va ma ta natu i ta vavina kai tamam, nina ba tamam i ga vangala, tago amur taina.

¹²Koko una va ma tubum nina ba tai tamam, tago dir taina.

¹³Koko una va ma tana vavi tinam, tago dir tana vavina.

¹⁴Koko una va ma ra taulai kai tamam dir turana ma nina i vangala u, tago amur tamana.

¹⁵Koko una va ma kakum, tago ia ra taulai kai natum.

¹⁶Koko una va ma tamaiam, tago ia ra taulai kai turam.

¹⁷Koko una va ma ta vavina dir ma natuna, a vavina; koko una va ma ta vavina dir ma tubuna, a vavina; tago dir niuruna; tago go iat ia ra kaina.

¹⁸Koko una ben pa tamaiam, nina ba dir tana vavina ma kaum taulai, upi una va me, ba kaum taulai i laun boko.

¹⁹Koko una tadav ta vavina upi amur a va me, ba pa i gomgom boko ta kana gai.

²⁰Koko una va ma ra taulai kai talaim upi una kaina tana.

²¹Koko una nur tar ra umana natum upi da tun diat ta ra iap kai Molek, ma koko una vabilak ra iang i kaum God; iau ra Luluai.

²²Koko una va ma ta tutana da ma ra vavina, ia ra magit i bilak.

²³Koko una va ma ta vavaguai upi una bilak tana; ma koko ta vavina na tadav ta vavaguai upi na va ure; a bilak na purpuruan nam.

²⁴Koko avat a vabilak avat tai tikai ta go diat, tago ra umana Tematana nina ba iau korot vue diat kan ra luaina mata i vavat, dia bilingiran ma diat,

²⁵ma ra gunan i kaina tana; damana iau kure ra gunan, ma ra gunan i marue vue diat dia ki tana.

²⁶Avat a torom ta kaugu lavur vartuluai, ma kaugu lavur varkurai; koko avat a pait ta tika na kaina magit ta go diat, ta te Israel tuna, ba ta vaira nina i ki varurung ma avat.

²⁷Tago nina dia ga ki lua ta vavat ta go ra gunan dia ga pait go ra umana bilak na magit, ma ra gunan i kaina tana;

²⁸upi koko ra gunan na marue vue bula avat da i ga marue vue ra umana Tematana nina dia ga ki lua ta vavat.

²⁹Tago nina i pait ta tikai ta go ra umana bilak na magit, da kutu vue nam kan kana vuna tarai.