A Niluluk 21:2-31

²Ma Israel i ga vavalima ta ra luaina mata i ra Luluai ma i ga biti: Ona una tul tar go ra tarai ta ra limagu, ina nila vakakit vue kadia lavur pia na pal.

³Ma ra Luluai i ga torom ta ra nilai Israel, ma i ga tul tar ra tarai Kanaan; ma dia ga nila vakakit vue diat ma kadia lavur pia na pal; ma di ga vatang ra iang i nam ra pakana ba Korma.

⁴Ma dia ga vanavana papa aro ra luana Or ta ra nga uro ra Ta Meme, upi diat a vana liliai kan ra gunan Edom; ma ra nuknuk i ra tarai i ga bilua ta ra nga.

⁵Ma ra tarai dia ga tata na urur ure God ma ure Moses: Upi ra ava amur ga ben vairop avet kan aro Aigipto upi avet a mat ta ra bil? Tago pa ta nian ma pa ta tava; ma ave milamila ta go ra nian vakuku.

⁶Ma ra Luluai i ga tulue ra umana varkarat na vui livuan pire ra tarai, ma dia ga karat diat; ma mangoro ta ra tarai Israel dia ga mat.

⁷Ma ra tarai dia ga tadav Moses ma dia ga biti: Ave ga pait ra kaina, tago ave ga tata na urur ure ra Luluai ma ure u; una araring tadav ra Luluai, upi na tak vue ra umana vui kan avet. Ma Moses i ga araring ure ra tarai.

⁸Ma ra Luluai i ga biti tai Moses: Una pait ta varkarat na vui ma una vatur ia tai ta davai; ma na dari, ba nina ba ra vui i ga karat ia na gire, na laun.

⁹Ma Moses i ga pait ra vui ma ra palariam gobol, ma i ga vatur ia tai ta davai; ma i ga dari: ona ta vui i ga karat ta tikai, ba i lingan upi ra vui na palariam, na laun.

¹⁰Ma ra tarai Israel dia ga vanavana, ma dia ga vavatur aro Obot.

¹¹Ma dia ga vanavana papa aro Obot, ina dia ga vavatur aro Ieabarim, ta ra bil pire ra langun Moab, ta ra papar ba ra keake i vana rikai tana.

¹²Dia ga vanavana papa aro, ma dia ga vavatur ta ra male Sered.

¹³Dia ga vanavana papa aro, ma dia ga vavatur ta ra papar a Amon maro, nina i ki ta ra bil pire ra langun kai ra tarai Amor; tago Amon ia ra langun kai Moab, livuan Moab ma ra tarai Amor.

¹⁴Damana ra tinata ta ra Buk ure ra umana Vinarubu kai ra Luluai: Vaeb aro Supa, Ma ra malamale Amon,

¹⁵Ma ra papar a male, Nina i tadav ra kiki kai Ar, Ma i lingan upi ra langun kai Moab.

¹⁶Ma papa aro dia ga vanavana tuk uro Ber, nina ra kivu ba ra Luluai i ga biti tai Moses ure: Una varurue ra tarai, ma ina vamomo diat ma ra tava.

¹⁷Ma ra tarai Israel dia ga kaile go ra kakailai: U a kivu una ninim rikai; avat a kakailai pirana:

¹⁸A kivu, nina ra umana luluai dia ga tikan tadav ia, Ma ra umana ngalangala kai ra tarai dia ga kal ia, Ma ra buka na varkurai, ma kadia umana buka. Ma dia ga vanavana papa aro ta ra bil tuk uro Matana;

¹⁹ma papa aro Matana tuk uro Nakaliel, ma papa aro Nakaliel tuk uro Bamot;

²⁰ma papa aro Bamot tuk uro ra male ta ra langun kai Moab pire ra ul a luana Pisga, nina i gigira ba ura ra bil.

²¹Ma Israel i ga tulue ta umana tultul tadav Sikon, a king kai ra tarai Amor, ma i ga biti:

²²Iau lul u ba ina vana vurbolo ta kaum gunan; pa avet a vana irai tadav ta uma, ba tadav ta uma na vain; pa avet a momo ta ra tava ta ra umana kivu; avet a vanavana ka ta ra nga tur kai ra king, tuk ave tar bolo vurakit kan kaum langun.

²³Ma Sikon pa i ga mulaot ba Israel na bolo ta kana langun; ma Sikon i ga varurue kana loko na tarai, ma i ga tut ure Israel uro ta ra bil, ma i ga vana tadav Iasa; ma dia ga varubu ma Israel.

²⁴Ma Israel i ga ub ia ma ra pakat na vinarubu, ma i ga kale kana gunan papa Amon tuk uro Iabok ta ra langun kai ra tarai Amon, tago ra langun kai ra tarai Amon i ga dekdek.

²⁵Ma Israel i ga kale go ra lavur pia na pal; ma Israel i ga ki ta ra lavur pia na pal kai ra tarai Amor, tai Kesbon, ma ta kana lavur pia na pal.

²⁶Tago Kesbon ia ra pia na pal kai Sikon, a king kai ra tarai Amor, nina dir ga varubu ma ra king Moab lua, ma i ga kap pa kana pia parika kan ra limana, tuk uro Amon.

²⁷Damana ra umana tena pit kakailai dia biti: Avat a vana Kesbon, Boina ba da pait ra pia na pal kai Sikon ma da vatut ia;

²⁸Tago ra iap i ga vana rikai tai Kesbon, Ma ra birao ta ra pia na pal kai Sikon; I ga vaimur vue Ar-Moab, Ma ra umana luluai ta ra lualuana Amon.

²⁹Na kaina tam, Moab! Avat a malari, avat a tarai kai Kemos; I ga tul tar kana umana bul tutana upi diat a puiap, Ma kana umana bul vavina upi ra kini na vilavilau, Pire Sikon, a king kai ra tarai Amor.

³⁰Damana ra umana bul mur ta diat dia ga virua, Papa Kesbon tuk uro Dibon, Ave ga varli Tuk ra iap i ga tadav ra gunan Medeba.

³¹Damana ra tarai Israel dia ga ki ta ra gunan kai ra tarai Amor.