A Niluluk 12:2-14

²Ma dir ga biti: Dave, ra Luluai i ga tata ka tai Moses? Pa i ga tata ta mimir bula vang? Ma ra Luluai i ga valongore.

³Ma ra tutana Moses i ga madu tuna ra maukuana, ta diat ra tarai par ta ra rakarakan a gunagunan.

⁴Ma ra Luluai i ga vakaian dital Moses ma Aron ma Miriam, ma i ga biti: Amutal a vana uti ta ra pal na varbarat. Ma dital ga irop.

⁵Ma ra Luluai i ga vana ba ta ra bakut ma i ga tur ta ra matakilalat i ra pal na varbarat, ma i ga oro pa Aron ma Miriam; ma dir ga vana rikai.

⁶Ma i ga biti: Amur a valongore kaugu tinata: gala ta propet i ki livuan ta vavat, iau ra Luluai ina vaarike tar iau mulai pirana ta ra ninana, ma ina tata pirana ta ra ririvon.

⁷Kaugu tultul Moses pa i damana; ia iat i dovot ta ra kubagu parika;

⁸amir tata vargil ma ra ngie i mimir, i kapa ma vakir i pidik; ma ia iat na gire ra malalar i ra Luluai; dave pa amur ga burut upi amur a tata bat kaugu tultul Moses?

⁹Ma ra kankan kai ra Luluai i ga karangap ure dir. Ma i ga vana ka.

¹⁰Ma ra bakut i ga kakari kan ra ul a pal na mal, ma ea, Miriam i ga vukavuka, i pua da ra kabang; ma Aron i ga bobe Miriam, ma ea, i ga vukavuka.

¹¹Ma Aron i ga biti tai Moses: Kaugu luluai, koko una bali kamimir varpiam, iau lul u, tago amir ga papait na papaua, ma amir ga pait ra varpiam.

¹²Iau lul u, koko da nur vue upi na da ra minat, nina ra viono i papar a iba ba di kava vue.

¹³Ma Moses i ga kail tadav ra Luluai, ma i ga biti; Una valagar ia, God, iau lul u.

¹⁴Ma ra Luluai i ga biti tai Moses: Gala tamana i ga nami ka ra matana, na ga vavirvir lavurua na bung, laka? Da banu bat ia ta ra papar a gunan irai lavurua na bung, ma namur da varuk mule.