A Niluluk 10:12-32

¹²Ma ra tarai Israel dia ga tur pa kadia vinavana kan ra bil Sinai; ma ra bakut i ga tur ta ra bil Paran.

¹³Ma dia ga tur pa kadia vinavana da ra vartuluai kai ra Luluai ta ra ngie i Moses.

¹⁴Ma ra vakilang i ra gunan kai ra vuna tarai Iuda i ga tur value pa ra vinavana da kadia lavur kor; ma Nason natu i Aminadab i ga lue nam ra kor.

¹⁵Ma Netanel natu i Suar i ga lue ra kor kai ra vuna tarai Isakar.

¹⁶Ma Eliab natu i Elon i ga lue ra kor kai ra vuna tarai Sebulun.

¹⁷Ma di ga pala pa ra pal na mal; ma ra umana natu i Gerson, ma ra umana natu i Merari, nina dia ga puak ra pal na mal, dia ga tur pa ra vinavana.

¹⁸Ma ra vakilang i ra gunan kai Ruben i ga tur pa ra vinavana da kadia lavur kor; ma Elisur natu i Sedeur i ga lue nam ra kor.

¹⁹Ma Selumiel natu i Surisadai i ga lue ra kor kai ra vuna tarai Simeon.

²⁰Ma Eliasap natu i Deuel i ga lue ra kor kai ra vuna tarai Gad.

²¹Ma ra apik na tarai Koat dia ga tur pa ra vinavana, ma dia ga puak ra lavur magit i gomgom; ma dia ga vatut ra pal na mal ba pa dia ga ti pot.

²²Ma ra vakilang i ra gunan kai ra vuna tarai Epraim i ga tur pa ra vinavana da kadia lavur kor; ma Elisama natu i Amiud i ga lue nam ra kor.

²³Ma Gamaliel natu i Pedasur i ga lue ra kor kai ra vuna tarai Manase.

²⁴Ma Abidan natu i Gideoni i ga lue ra kor kai ra vuna tarai Beniamin.

²⁵Ma ra vakilang i ra gunan kai ra vuna tarai Dan, nina i ga murmur bat ra lavur kor, i ga tur pa ra vinavana, da kadia lavur kor; ma Akieser natu i Amisadai i ga lue nam ra kor.

²⁶Ma Pagiel natu i Okram i ga lue ra kor kai ra vuna tarai Aser.

²⁷Ma Akira natu i Enan i ga lue ra kor kai ra vuna tarai Naptali.

²⁸Damana ra tarai Israel dia ga vanavana da kadia lavur kor; ma dia ga tur pa ra vinavana.

²⁹Ma Moses i ga biti tai Kobab, natu i Reuel a te Midian, nimu i Moses, dari: Ave vanavana upi ra gunan nina ra Luluai i ga biti ba na tabar avet me; dat a varagur, ma avet a pait ra boina piram; tago ra Luluai i ga biti ba na pait ra boina pire Israel.

³⁰Ma i ga biti tana: Pa ina vana, ia kaka ina talil mulai ta kaugu gunan, tadav ra umana niurugu.

³¹Ma i ga biti: Iau lul u, ba koko una vana kan avet; tago u nunure ba avet a vatur kaveve umana pal na mal ta ra bil, ma una da ra kiau na mata ure avet.

³²Ma na dari, ona da varagur; maia pa, na dari, ba ra lavur bo na magit ra Luluai na pait ia ta vevet, avet bula avet a pait ia tam.